ევროპული საქართველოს ლიდერმა, დავით ბაქრაძემ, აბაშის მოსახლეობას პარტიის მაჟორიტარობის კანდიდატი წალენჯიხის, ჩხოროწყუს, მარტვილისა და აბაშის ოლქში, ლელა ქებურია წარუდგინა.

ლელა ქებურიას თქმით, ხალხს აქვს გარდამტეხი ცვლილებების მოლოდინი, ხოლო ევროპულ საქართველოს აქვს კონკრეტული გეგმა, თუ როგორ უნდა ამოვიდეს ქვეყანა კრიზისიდან. დავით ბაქრაძე აცხადებს, რომ ევროპული საქართველო იქნება სწორი მიმართულების კომპასი გარდამტეხი ცვლილებებისათვის.

"ამ ხალხს აქვს ცვლილებების მოლოდინი და მოთხოვნილება იმისა, რომ მოხდეს გარდამტეხი ცვლილებები ეკონომიკაში, სოციალური მიმართულებით, კრიმინალთან ბრძოლის მიმართულებით, საკუთრებასთან დამოკიდებულების მიმართულებით და სასამართლო რეფორმის მიმართულებით. ჩვენ გვაქვს კონკრეტული გეგმა, ყველა ამ კონკრეტული მიმართულებით როგორ გამოვიყვანოთ ქვეყანა კრიზისიდან", — განაცხადა ლელა ქებურიამ.

"ჩვენი ვალდებულება და მიზანია, რომ გადასახადების შემცირების გზით შევქმნათ ახალი ადგილები და თითოეულ ოჯახს ყოველწლიურად 2000 ლარი დავუზოგოთ. ჩვენი ვალდებულება და მიზანია, რომ წლის ბოლომდე გავაორმაგოთ პენსიები, სოციალური და დევნილთა დახმარებები, ჩვენი ამოცანა და მიზანია, რომ ადამიანებს დავუბრუნოთ სახელმწიფო საკუთრებაში არსებული ქონება და დავაბრუნოთ ქვეყანაში სიმშვიდის და დაცულობის განცდა", — განაცხადა დავით ბაქრაძემ.