თამარ ბაჩალიაშვილის ავტომობილის ექსპერტიზის პირველადი დასკვნის შესახებ გარდაცვლილის ოჯახის ადვოკატმა, მიხეილ რამიშვილმა განაცხადა, რომ ავტომობილს არ ჰქონდა კომპიუტერული მახსოვრობა და ინფორმაცია იმაზე, თუ რამდენ ხანს იდგა ავტომობილი, ვერ მიიღეს.

"კომპიუტერი არ ჰქონია ისეთი რანგის, რომ ინფორმაცია ბოლომდე მიგვეღო, მაგრამ ერთი საინტერესო რამ იყო, რომ ამ სიცხეში, ივლისის თვეში, გადაადგილების პერიოდში რატომღაც კონდენციონერი იყო გამორთული. მირტყმული არის თვითონ სახელურის მხარე და კარების მხარე არის დაზიანებული. არ გააჩნია ამ ავტომობილს იმის მონაცემები, რომ დადგინდეს რამდენი ხანი იდგა. შემიძლია გითხრათ, რომ ზეთი ავტომობილში იყო ახალი გამოცვლილი", — განაცხადა რამიშვილმა.

გარდაცვლილის მამამ განაცხადა, რომ აღმოჩენის შემთხვევაში მეხსიერების ბარათი ყველაფერს თავდაყირა დაააყენებდა.

"როგორც ის ფაქტები, ყველაფერი წაშალეს იგივე დამხვდა აქაც, იგივე სიტუაცია. ფლეშკა აღარ არის, რაც საჭირო იყო. გააქრეს, ეს ფაქტიც გააქრეს. ფლეშკა ყველაფერს თავდაყირა დააყენებდა", — განაცხადა ჯუმბერ ბაჩალიაშვილმა

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.