ბერლინის კლინიკის შარიტეს განცხადებით, ოპოზიციონერი ალექსეი ნავალნის სიცოცხლეს საფრთხე არ ემუქრება.

როგორც კლინიკაში აცხადებენ, იგი კვლავ რჩება სამედიცინო კომაში და ხელოვნური სუნთქვის აპარატზეა შეერთებულია. მათივე თქმით, მოწამვლის სიმპტომები ნელ-ნელა ქრება. ექიმებმა მისი მდგომარეობა სტაბილურად შეაფასეს.

"მიუხედავად იმისა, რომ მდგომარეობა მძიმეა, მის სიცოცხლეს პირდაპირი საფრთხე არ ემუქრება", — ნათქვამია კლინიკის განცხადებაში.

ამასთან, ნავალნის პრესმდივანი, კირა იარმიში ტვიტერზე წერს, რომ ექიმები ჯერ კიდევ პროგნოზს არ იძლევიან.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

თავდაპირველად ნავალნი ომსკის კლინიკაში მოათავსეს, სადაც თქვეს, რომ მის ორგანიზმში რაიმე საეჭვო ნივთიერება ვერ იპოვეს.

22 აგვისტოს ნავალნი სპეცთვითმფრინავით რუსეთიდან გერმანიაში გადაიყვანეს. ექიმებმა დაადასტურეს, რომ საქმე "შესაძლო" მოწამვლასთან იყო. დღემდე კლინიკის მახლობლად პოლიციის რამდენიმე ავტობუსი და 10-მდე სამართალდამცავი მორიგეობს, რომლებიც პერიმეტრზე 2-5 კაციანი ჯგუფით გადაადგილდებიან.

ალექსეი ნავალნის მოწამვლის საქმის გამოძიება მოითხოვეს გერმანიის კანცლერმა, ანგელა მერკელმა და ევროკავშირის უმაღლესმა წარმომადგენელმა, ჟოზეფ ბორელმა. აღნიშნულ განცხადებას აშშ-ს სახელმწიფო მდივანი, მაიკ პომპეოც შეუერთდა. გამოძიების მხარდაჭერის მზაობა გამოთქვა დიდი ბრიტანეთის პრემიერმინისტრმა, ბორის ჯონსონმა.

რუსეთის დუმის კომიტეტმა გამოძიება დაიწყო, თუმცა მათ გადაწყვიტეს, რომ ოპოზიციონერის მოწამვლაში საგარეო ჩარევა ეპოვათ. თვითონ რუსეთს პრეზიდენტი ვლადიმერ პუტინი კი ამტკიცებს, რომ ობიექტური გამოძიების მომხრეა.