პრემიერმინისტრ გიორგი გახარიას განცხადებით, ისინი კამპანიას მხოლოდ მომავალზე აგებენ. ასე უპასუხა მან ჟურნალისტების კითხვას — გამომდინარე იქედან, რომ ირაკლი ღარიბაშვილმა სიტყვით გამოსვლისას დიდი დრო ყოფილ ხელისუფლებას დაუთმო, აგებს თუ არა მმართველი პარტია 2020 წლის არჩევნებსაც ნაციონალური მოძრაობის კრიტიკაზე.

"ჩვენ კამპანიას ვაგებთ მხოლოდ და მხოლოდ მომავალზე, თუ მოისმინეთ სულ მომავალზე ვლაპარაკობდი. რა თქმა უნდა, შეუძლებელია წარმატებული მომავლის მშენებლობა მშვიდობის გარეშე. არ უნდა დაგვავიწყდეს, რომ აგვისტოს დღეებია დღეს და ირაკლი ღარიბაშვილმა თუ აქცენტები გააკეთა, ისიც უნდა გვახსოვდეს, რომ იგი თავდაცვის მინისტრია და მისთვის ამ მშვიდობის განზომილებას აქვს უდიდესი მნიშვნელობა. თორემ მთლიანი კამპანია იქნება მხოლოდ პოზიტიური და მომავალზე, ახალგაზრდობაზე და უკვე დაწყებული საქმეების დასრულებასა და ახლების დაწყებაზე ორიენტირებული", — თქვა გახარიამ.

კახეთში მაჟორიტარი დეპუტატის წარდგენისას თავდაცვის მინისტრმა, ირაკლი ღარიბაშვილმა კვლავ ახსენა წინა ხელისფულება და ისინი ომის ვერაცილებაში დაადანაშაულა. მისივე თქმით, ამის გამო ნაციონალურ მოძრაობას პოლიტიკაში ყოფნის უფლება არ აქვს.