ფინანსთა მინისტრმა, დიმიტრი ქუმსიშვილმა ფრაქცია პატრიოტთა ალიანსთან შეხვედრისას განაცხადა, რომ ტურიზმი ძალიან მნიშვნელოვანი შემოსავალია ქვეყნისთვის და ეს სფერო მოსახლეობის კეთილდღეობაზეც ახდენს გავლენას. ქუმსიშვილმა ამის მაგალითად პირადი ისტორია გაიხსენა:

"ოჯახთან ერთად, შარშან ვიყავი უშგულში. დიდი ხანი არ ვიყავი ნამყოფი, ჩავედი უშგულში და ყველა სახლს აწერია გესთ ჰაუსი - სასტუმრო. გავჩერდით ერთ სახლში, ბევრნი ვიყავით, ძალიან მოვილხინეთ. დილით ჩამოვედი და ბავშვებისთვის მოვინდომე სუვენირების შეძენა. ბრჭყვიალა ქვა, კაჟი, რომელიც მდინარეს მოქვს ღირს 20 ლარი. პატარა სვანური კოშკი, ხელით გამოთლილი ღირს 20 ლარი. მე, რა თქმა უნდა, 3 შვილი მყავს - 2 პატარა, 1 უფროსი. ამოვიღე ჯიბიდან ფული და იმისათვის, რომ ორივესთვის მეყიდა, ფული გადავიხადე და ძალიან გამიხარდა. იცით რა გამიხარდა? როდესაც მე ქალბატონს ასლარიანი გავუწოდე იმისათვის, რომ მეყიდა რაღაც, მან ჯიბიდან ამოიღო ბღუჯა. ბღუჯა ამოიღო ფულის, ქალბატონო ადა, ბღუჯა. ახლაც ტანში მაჟრიალებს იმიტომ, რომ სიამოვნებისგან, გეფიცებით, კინაღამ დავკოცნე ის ქალი. ეს არის ტურიზმის გავლენა."