რუსეთ-საქართველოს ომი 2008 წელს არ დაწყებულა და მას წინ რუსეთის მრავალწლიანი აგრესია უძღოდა — ამის შესახებ ევროპარლამენტარმა, ვიოლა ფონ კრამონმა Twitter განაცხადა.

"12 წელი გავიდა, რაც საქართველოში რუსეთი შეიჭრა, მაგრამ ომი 2008 წელს არ დაწყებულა და ჯერ არც დამთავრებულა. 2008 წლის მოვლენებს უძღოდა რუსეთის მრავალწლიანი აგრესია, რომელიც გრძელდება მცოცავი ოკუპაციითა და საქართველოს მოქალაქეების გატაცებით", — წერს ევროპარლამენტარი.

ვიოლა ფონ კრამონი ხაზს უსვამს, რომ რუსეთს 2008 წლის ცეცხლის შეწყვეტის შეთანხმება ჯერ კიდევ არ შეუსრულებია, რისთვისაც მან პასუხი უნდა აგოს.

მისივე თქმით, ევროკავშირი საქართველოს გვერდით დგას.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.