პარლამენტის თავმჯდომარე აცხადებს, რომ ნარკოპოლიტიკასთან დაკავშირებით საჭიროა კანონმდებლობის გარკვეული გადახედვა, თუმცა, მისივე თქმით, კონკრეტული მიმართულება განხილვებისას გამოჩნდება. ამის შესახებ კობახიძემ დღეს, 11 დეკემბერს ჟურნალისტებთან საუბრისას განაცხადა:

"მე შეხვედრა მქონდა შესაბამის არასამთავრობო ორგანიზაციებთან, ჯერ კიდევ არჩევნების ჩატარებამდე, ჩვენ აქტიურად განვიხილავთ ამას და დაიწყება ამ საკითხებზე მსჯელობა საქართველოს პარლამენტში. საჭიროა კანონმდებლობის გარკვეული გადახედვა, ხოლო, კონკრეტულად თუ რა მიმართულებით უნდა გადაისინჯოს, ამას უკვე შემდგომი განხილვები გადაწყვეტს".

გუშინ, 10 დეკემბერს, ადამიანის უფლებების დაცვის საერთაშორისო დღეს, ყოფილი პარლამენტის შენობის წინ აქცია დეკრიმინალიზაცია 2016 გაიმართა, სადაც შეკრებილები ნარკოტიკების მოხმარების დეკრიმინალიზაციას ითხოვდნენ.

თეთრი ხმაურის მოძრაობის ინფორმაციით, ნარკოპოლიტიკის ეროვნული პლატფორმის ფარგლებში მზადდება საკანონმდებლო ინიციატივაც.

მათი მთავარი მოთხოვნაა ხელისუფლებამ წელსვე გამოაცხადოს მოხმარების დეკრიმინალიზაცია ნარკოპოლიტიკის ლიბერალიზაციის პროცესში დეკლარირებულ მიმართულებად და დაუყოვნებლივ დაიწყოს მუშაობა სადამსჯელო პოლიტიკის ჯანდაცვის მიდგომებით ჩანაცვლებაზე.