BBC თურქეთის შინაგან საქმეთა მინისტრის ინფორმაციაზე დაყრდნობით იუწყება, რომ სტამბოლის ცენტრში ფეხბურთის სტადიონთან მომხდარი აფეთქებების შედეგად, 29 ადამიანი დაიღუპა, 166 კი დაშავდა. შემთხვევა 10 დეკემბერს, გვიან ღამით მოხდა.

ერთი აფეთქების ხმა გაისმა ტაქსიმის მოედანთან ახლოს, მეორე კი საფეხბურთო კლუბ ბეშიქთაშის სტადიონის მიმდებარედ, სადაც საფეხბურთო მატჩი ბეშიქთაშსა და ბურსასპორს შორის ახალი დამთავრებული იყო. BBC თურქეთის ოფიციალურ წყაროებზე დაყრდნობით წერს, რომ სავარაუდოდ თვითმკვლელმა ტერორისტმა, ავტომანქანა ორი საათის შემდეგ ააფეთქა, მას შემდეგ, რაც მაყურებელმა სტადიონი დატოვა.

ფოტო: Reuters

პრეზიდენტმა რეჯეპ ტაიპ ერდოღანმა დაღუპულების შესახებ აცნობა მედიას, თუმცა დეტალურად მომხდარზე არ უსაუბრია:

"ტერორისტული თავდასხმა ჩვენი უსაფრთხოების ძალებისა და მოქალაქეების წინააღმდეგ განახორციელეს. საფეხბურთო თამაშის მერე აფეთქება მიზნად ისახავდა მაქსიმალურ მსხვერპლს, შედეგად, სამწუხაროდ გვყავს დაღუპულები და დაშავებულები".

ჯერჯერობით არცერთ დაჯგუფებას არ აუღია პასუხისმგებლობა მომხდარზე, თუმცა ამ წელს თურქეთში არაერთი აფეთქება განახორციელეს ქურთულმა დაჯგუფების და ტერორისტული ორგანიზაცია ე.წ. ისლამური სახელმწიფოს მებრძოლებმა.

2016 წელს მომხდარი აფეთქებები თურქეთში

  • 20 აგვისტო - გაზიანეტეპში ქორწილზე თავდასხმას 30 ადამიანი ემსხვერპლა, პასუხისმგებლობა ე.წ. ისლამურმა სახელმწიფომ აიღო.
  • 30 ივლისი - 35 ქურთი მებრძოლი, რომლებიც ცდილობდნენ სამხედრო ბაზაზე თავდასხმას, თურქეთის არმიამ დახოცა.
  • 29 ივლისი - ათათურქის აეროპორტში აფეთქებასა და შეიარაღებულ თავდასხმას 41 ადამიანი ემსხვერპლა, მომხდარში ბრალი დასდეს ე.წ. ისლამური სახელმწიფოს მებრძოლებს.
  • 13 მარტი - ანკარაში ქურთი მებრძოლების თავდასხმას 37 ადამიანი ემსხვერპლა.