დაკარგული 23 წლის ქალის ახლობლებმა ფონიჭალაში გზა გადაკეტეს. მათი განცხადებით, სჭირდებათ პასუხები, რა ეტაპზეა გამოძიება და რატომ ვერ პოულობენ მეოთხე დღეა დაკარგულ ქალს.

მათთან შესახვედრად საქმის გამომძიებელი მივიდა. ოჯახის ახლობლების განცხადებით, ეს პირველი შემთხვევაა, როცა მათ საქმის მიმდინარეობაზე ინფორმაცია მიაწოდეს.

თეთრიწყაროს მუნიციპალიტეტში მეოთხე დღეა 23 წლის ქალს, თამარ ბაჩალიაშვილს ეძებენ. შინაგან საქმეთა სამინისტრო გამოძიებას თავისუფლების უკანონო აღკვეთის მუხლით აწარმოებს.

ოჯახის ინფორმაციით, ქალი ქვემო ფონიჭალადან შაბათს, 18 ივლისს გავიდა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს, მაგრამ სამდღიანი სამძებრო სამუშაოების მიუხედავად, ავტომობილს და ქალს ვერ მიაგნეს.