წელიწადი და შვიდი თვის შემდეგ, კონკურენციის სააგენტომ ხორბლისა და პურპროდუქტების ბაზრის მონიტორინგი დაასრულა და დაადგინა, თუ რატომ გაძვირდა პური 2018 წლის 10 დეკემბერს. კონკურენციის სააგენტო აღნიშნავს, რომ რომ პურის ფასის ზრდას სისტემური ეფექტი ჰქონდა მთელი ქვეყნის მასშტაბით:

"დადგინდა, რომ 2018 წლის 10 დეკემბერს პურის ფასის ზრდა კომპანიების გონივრულ/დანახარჯებზე დაფუძნებულ გადაწყვეტილებას წარმოადგენდა, წინააღმდეგ შემთხვევაში შეუძლებელი იქნებოდა რენტაბელური ეკონომიკური საქმიანობის განხორციელება".

სააგენტოს გამოქვეყნებულ მონიტორინგის შედეგებში გაძვირების მიზეზები ჩაწერა, რომ 2015-2018 წლებში ხორბლის ბაზრის იმპორტის დონის სტრუქტურა შეიცვალა, გაიზარდა იპორტიორთა რაოდენობა, შემცირდა ბაზრის კონცენტრაციის ინდექსი და ქვედა დონის ხორბლის საბითუმო მიწოდების ბაზარზე კონკურენცია გაძლიერდა.

გასული წლის სექტემბერში მამუკა ბახტაძე პრემიერ-მინისტრის პოსტიდან ისე გადადგა, რომ კონკურენციის სააგენტომ მისი დავალება, რის გამო გაძვირდა პური, ვერ შეასრულა. საკითხის შესწავლა სააგენტოს მამუკა ბახტაძემ 2018 წლის 10 დეკემბერს დაავალა.

სააგენტომ ფასის ზრდის შესწავლა 2018 წლის 10 დეკემბერს მაშინდელი პრემიერის დავალებით დაიწყო. მაშინ ზრდა 5-დან 10 თეთრამდე იყო. 2019 წლის იანვრიდან 2020 წლის იანვრამდე ფასის ზრდა 5 პროცენტი იყო, რამაც მანამდე ერთ ლარად გასაყიდი პროდუქტის ფასი 5 თეთრით გაზარდა.