პატრიოტთა ალიანსის წევრი, პარლამენტარი ადა მარშანია ამბობს, რომ მათ მიმართ ნაციონალური მოძრაობის ბრალდება რუსეთის აგენტობასთან დაკავშირებით, "ყურით მოთრეულია". ამის შესახებ მარშანიამ ახალ თაობას განუცხადა.

ადა მარშანიამ საგაზეთო ინტერვიუში ისაუბრა პატრიოტთა ალიანსის ინიციატივაზე, რომლის მიხედვითაც, ოკუპაციის შესახებ კანონი უნდა შეიცვალოს და ოკუპირებულ ტერიტორიებზე საქართველოს ხელისუფლების ნებართვის გარეშე შესვლისთვის, პირის მიმართ არ დაიწყოს სისხლის სამართლებრივი დევნა.

დეპუტატის თქმით, ამ თემაზე ხმაურის ატეხვა ნაციონალური მოძრაობის ინტერესებშია:

"ამ საკითხის ირგვლივ ხმაურის ატეხვას ერთი ერთი მიზანი აქვს - ნაციონალება ყურით მოათრიეს თემა, თითქოს ჩვენ ეფესბეს (რუსეთის დაზვერვის სამსახური) მიერ კონტროლირებადი ძალა ვართ. მივმართავ ამ უნამუსოებს, თუ გაქვთ დამამტკიცებელი დოკუმენტები, პროკურატურაში წაიღეთ, რატომ გვიტანთ 6 აგენტს პარლამენტში?

სერიოზულად თუ შევხედავთ ამ ბრალდებას, უკვე ძალიან ნერვებისმომშლელია. როგორ შეიძლება გიგა ბოკერიამ ჩვენ ან პატრიოტობა გვასწავლოს, ან სამშობლოს სიყვარული?"