საგანგებო სიტუაციების მართვის სამსახურის ინფორმაციით, სვანეთში სოფელ ხაიშთან ხანძრის 4 აქტიური კერიდან 3 ლოკალიზებულია. ტყის ხანძრის ქრობის სამუშაოები უკვე მეოთხე დღეა მიმდინარეობს.

"მთის ორ ფერდზე, არსებული 4 სხვადასხვა სირთულის კერიდან, მოხერხდა 3-ის ლოკალიზება. კერებთან შეყვანილია სახანძრო-სამაშველო ტექნიკა და მიმდინარეობს აქტიური სალიკვიდაციო სამუშაოები. მეოთხე ლოკაციაზე, რომელიც რელიეფურად ყველაზე რთულად მისადგომია, მუშაობს საჰაერო ძალა", — წერია განცხადებაში.

უწყების ინფორმაციით, ღამის განმავლობაში ტყეში ცოცხალი ძალა მუშაობდა დილით კი ლოკალიზების პროცესში ჩაერთო სასაზღვრო პოლიციის ვერტმფრენი. მათივე განცხადებით, ხანძრის სალიკვიდაციო სამუშაოებში სულ 4 ვერტმფრენია ჩართული და ადგილზე მობილიზებულია დამატებითი ცოცხალი ძალა თბილისიდან, ქვემო ქართლის, აჭარის და იმერეთის რეგიონებიდან.

საგანგებო სიტუაციების მართვის სამსახურში აცხადებენ, რომ ამ დროისთვის, ადგილზე სიტუაცია კონტროლს სრულად ექვემდებარება.