სახიფათო ზაფხული ნელ-ნელა იწურება, მაგრამ საფრთხის მოლოდინში, დარჩენილი დროის პანიკის გარეშე გასატარებლად, რამდენიმე წიგნი დაგეხმარებათ.

ტუვე იანსონი — სახიფათო ზაფხული

ერთ დროს, პაპანაქება სიცხეში გაცივება, უჩვეულო ამბავი გვეგონა, ისე როგორც მამა მუმინს. ახლა კი, როცა ადამიანების სამყაროს უხილავმა საფრთხემ მოულოდნელი განსაცდელი თავს დაგვატეხა, მუმინების ხეობაში წასასვლელად, ბევრს დავთმობდით. არც საშინელი გემოთი ცნობილ, დედა მუმინის საფირმო, ხახვიან და შაქრიან რძეზე ვიტყოდით უარს.

მათ, ვინც ტუვე იანსონის ილუსტრირებული სერია მუმინებსა და მეგობრებზე, არ იცის, წინ დაუვიწყარ თავგადასავლებს გპირდებით. სახიფათო ზაფხულთან ერთად, კომეტასაც დაველოდებით, მერე აღელვებული ზღვის ტალღები შეგვაშინებს ან საყვარელ პერსონაჟებთან ერთად, შორეული წარსულის ამბებს გავიხსნებთ, ასე ძალიან რომ გვენატრება. უეცრად შემოპარული საფთხე ხომ ვერაფერს გვავნებს, როცა გვერდით მუმინების ოჯახი, წუწუნა სნიფი და ისტორიებით სავსე წიგნებია.

// სულაკაურის გამომცემლობა

// მთარგმნ. ლიკა ჩაფიძე

იანუშ კორჩაკი — მეფე მათიუშ პირველი

სათავგადასავლო წიგნებში, უფლისწულებზე ბევრი გვსმენია, მაგრამ პატარა მათიუშივით საყვარელსა და ლომგულს, ცოტას თუ ვიცნობ. მამის გარდაცვალების შემდეგ, მათიუშს ძალიან პატარა ასაკში მოუწევს ტახტზე ასვლა. მინისტრების თქმისა არ იყოს, ასეთი ბეწო მეფისა არავის შეეშინდება. მაგრამ განა უნდა მეფეს ვინმეს შეშინება?! ეს ერთი შეხედვით, ზღაპრული ამბავი, უპირობო სიყვარულს აჩუქებს ნებისმიერ მკითხველს, საკითხავად ტახტზე პატარა ასაკში ასულს თუ მინისტრების ხელას.

// სულაკაურის გამომცემლობა

// მთარგმნ. ლოლა ქადაგიშვილი

ილია ჭანტურია - ნინოშვილის 25

მეფე მათიუში რომ გაიზრდება და წერას ქართულადაც ისწავლის, ალბათ სოციალური პრობლემებითა და უძრაობით სავსე მოთხრობებს დაწერს, სადაც უფასოდ დარიგებული შოკოლადები და უზომო სიხარული, მხოლოდ ზღაპრებში იარსებებს, თაროებზე, მივიწყებულ და გადაკარგულ წიგნებში. თანამედროვე ქართველი ავტორი ილია ჭანტურია, ნამდვილად მათიუშივით ადრე გამოჩნდა დიდ ლიტერატურაში და გულწრფელი, ნამდვილი ამბები დაწერა.

მოთრობები საშინელ, ღარიბ და პრობლემურ სამყაროზეა, უძრაობის მარწუხებში უნებურად მომწყვდეული საზოგადოებით. ასეთი მდგომარეობის გარღვევა, პერსონაჟების მთავარი მიზანია. მოცემული რეალობის მიუხედავად, სადღაც შორიდან, მთხრობელის კეთილი ხმა ისმის, რომელიც გვპირდება, სხვა სამყაროში კონდიციონერსაც ვიყიდით და კეთილი მეფე, შოკოლადებსაც დაურიგებს ყველა ბავშვს, ასე უბრალოდ, სიკეთის ნიშნად.

// გამომცემლობა ინტელექტი

ელენა ფერანტე — მარტოობის დღეები

ერთ დღესაც ბავშვები, პროდუქტების ყიდვა, სადილ-ვახშამი, ფულის შოვნა და მიტოვების სხვა პრაქტიკული შედეგები, ერთიანად შერჩება ოლგას, როცა ქმარი აპრილის ერთ საღამოს გამოუცხადებს, გტოვებო. ეს სტანდარტული ისტორია ელენა ფერანტეს წიგნში: „მარტოობის დღეები განსხვავებულად იშლება. ოლგას არ უნდა დანებება. მას ძლიერი, გამარჯვებული ქალის ადგილზე ყოფნა სურს, მაგრამ თანდათან მზარდი შიში და სასოწარკვეთა, მთავარ გმირს ტანჯვად ექცევა. ფერანტეს წიგნი ერთ დღეში იკითხება და ყველასთვის მოსაწონია, მინისტრების, წყვილებისა თუ მოწყენილი ბებიებისთვის. ჩემი ბებია, თანხმობას გიგზავნით. იქნებ, ერთ დღესაც, საფრთხემაც გამოგვიცხადოს, გტოვებთო.

// გამომცელობა ზოლიანი კატა

// მთარგმნ. ხათუნა ცხადაძე

დაგლას ადამსი — ჰიჩჰაიკერის გზამკვლევი გალაქტიკაში

თუ აქედან ჩამოთვლილი არცერთი რჩევა არ მოგერგოთ, მაშინ დროა პლანეტის დატოვებაზე იფიქროთ. ამის საუკეთესო მაგალითია: ჰიჩჰაიკერის გზამკვლევი გალაქტიკაში, დაგლას ადამსის იუმორისტული სამეცნიერო ფანტასტიკა. წიგნში ამ პლანეტიდან გაქცევისთვის მშვენიერ ინსტრუქციას ამოიკითხავთ:

"როგორ გავიქცეთ ამ პლანეტიდან:

1. დარეკეთ ნასაში. მათი ნომერია: (731) 483-3111. აუხსენით, რომ ძალიან გჭირდებათ და რაც შეიძლება სწრაფად გსურთ დედამიწის დატოვება;
2. თუ თანამშრომლობაზე უარს იტყვიან, მაშინ დაუკავშირდით ნებისმიერ ნაცნობს თეთრ სახლში - (202) 456-1414 - და “ნასასთან” საქმის ჩაწყობა სთხოვეთ;
3. თუ თეთრ სახლში ნაცნობები არ გყავთ, დაუკავშირდით კრემლს (ოპერატორს სთხოვეთ საზღვარგარეთთან დაკავშირება, ნომერზე: 0107-095-295-9051). არა მგონია, “ნასაში” მეგობრები ჰყავდეთ (ყოველ შემთხვევაში, არ ამჟღავნებენ), მაგრამ რაღაც გავლენა ნამდვილად აქვთ და ცდას წინ არაფერი უდგას;
4. თუ არც აქ გაგიმართლათ, მიმართეთ რომის პაპს. მისი ნომერია: 011-39-6-6982 და რამდენადაც ჩემთვის ცნობილია, სატელეფონო კომუტატორიც ნაკურთხი აქვს;
5. თუ ზემოაღნიშნული არცერთი რჩევა არ გაჭრის, ხელის ქნევით მოიხმეთ რომელიმე მფრინავი თეფში და აუხსენით, რომ სასწრაფოდ უნდა დატოვოთ პლანეტა, სანამ ტელეფონის ქვითარი მოგივათ.

დაგლას ადამსი

ლოს-ანჯელესი, 1983 და ლონდონი, 1985"

// სულაკაურის გამომცემლობა

// მთარგმნ. გურამ ღონღაძე