ჯანდაცვის მსოფლიო ორგანიზაციის ხელმძღვანელი, ტედროს ადჰანომ გებრეიესუსი აცხადებს, რომ პანდემიის დასრულებასთან ახლოსაც არ ვართ, უარესი კიდევ წინ არის. მისი თქმით, მიუხედავად მისა, რომ ზოგიერთმა ქვეყანამ პანდემიის მართვა შეძლო, ეს არ არის 1, 2 ან 3 ქვეყნის პრობლემა და კორონავირუსს როგორც სახელმწიფოების დონეზე, ისე გლობალურად ბრძოლა სჭირდება.

როგორც გებრეიესუსი ამბობს, გლობალური სოლიდარობის არარსებობა ვირუსის გავრცელებას ხელს უწყობს.

"გლობალური სოლიდარობის არარსებობა და გაყოფილი მსოფლიო ვირუსის გავრცელებას უწყობს ხელს. უარესი ჯერ კიდევ წინ არის", — განაცხადა ჯანდაცვის მსოფლიო ორგანიზაციის ხელმძღვანელმა.

ბოლო მონაცემებით, მსოფლიოში კორონავირუსის 10 302 867 შემთხვევაა დადასტურებული, მათ შორის გარდაცვლილია 505 518 ადამიანი და გამოჯანმრთელებულია 5 235 908.