ფინანსთა მინისტრმა, ივანე მაჭავარიანმა განაცხადა, რომ 20 ივნისის მოვლენები "ერთი დღეა" და სწორედ ამის გამო ვერ მოხვდა პრემიერმინისტრ გიორგი გახარიას წლიურ ანგარიშში. მისივე თქმით, მთავრობის ანგარიშში საუბარია იმ პოლიტიკაზე, რომელსაც ისინი ატარებენ.

"იმიტომ არის ეს ფორმატი ანგარიშის, რომ რაზეც უნდა ჩაეკითხებიან, მაგრამ ანგარიშში იყო ძირითადი მიმართულებები, მათ შორის ეკონომიკა, სოციალური ნაწილი საგარეო პოლიტიკა. 20 ივნისი ძალიან მძიმე დღეა ყველასთვის, მაგრამ ეს ერთი დღეა, თავისი შეცდომებით ყველას მხრიდან. ვისი მეტია, ამას ისტორია განსჯის და მომავალში უფრო დაკრისტალდება და გამოჩნდება. მაგრამ ანგარიშში რა სახით უნდა მოხვედრილიყო, არ ვიცი რაზეა ლაპარაკი. 10 შეკითხვა დაისვა მაგაზე და პასუხგაუცემელი არ დარჩება", — განაცხადა მაჭავარიანმა.

20 ივნისის მოვლენებიდან 1 წელი გავიდა. ყველაფერი იმით დაიწყო, რომ დილით საზოგადოებამ პირდაპირ ეთერში საქართველოს პარლამენტის თავმჯდომარის სკამში ოკუპანტი ქვეყნის კომუნისტი დეპუტატი იხილა. სწორედ აქედან დაიწყო მშვიდობიანი პროტესტი, რასაც მართლმადიდებლობის საპარლამენტთაშორისო ასამბლეის ჩაშლა მოჰყვა, გავრილოვს კი ქვეყნის დატოვება მოუხდა.

პროტესტი პარლამენტთან გაგრძელდა. მთავარი მოთხოვნა პარლამენტის თავმჯდომარის, ირაკლი კობახიძის გადადგომა იყო, რომელიც აწერდა ხელს ასამბლეის დღის წესრიგს. მას შემდეგ, რაც აქციის მონაწილეების მცირე ნაწილმა გააჟღერა მოთხოვნები პარლამენტში შესვლასთან დაკავშირებით, მათსა და პოლიციას შორის დაპირისპირება მოხდა. მოქალაქეების დიდი ნაწილი ამ პროცესში ჩართული არ ყოფილა. ხელისუფლებამ სპეცრაზმი გამოიყვანა, ისე, რომ ამის შესახებ ტერიტორიაზე შეკრებილი ადამიანები არ გააფრთხილა. გამოიყენეს რეზინის ტყვიები და ცრემლსადენი გაზი. შედეგად, რამდენიმე მოქალაქემ თვალი, ზოგმა კი მხედველობა დაკარგა. დაშავდა დაახლოებით 240 ადამიანი, მათ შორის, ჟურნალისტები.

გამოძიება ორი მიმართულებით მიმდინარეობს: ერთში აქციის მონაწილეებს პარლამენტში შეჭრას ედავებიან, მეორეში კი, სამართალდამცავებს ძალის გადამეტებას.