შინაგან საქმეთა სამინისტროს ინფორმაციით, გროში ნაციონალური მოძრაობის ოფისზე თავდასხმის ფაქტზე 51 წლის პირი დააკავეს. შემთხვევა დღეს, 26 ივნისს დილით მოხდა.

"გამოძიებით დადგინდა, რომ ბრალდებულმა ქვები ესროლა ქალაქ გორში გარსევანიშვილის ქუჩა #1-ში მდებარე ერთიანი ნაციონალური მოძრაობის ოფისის შენობის შუშებს და დააზიანა, ასევე, ოფისიდან გამოიტანა ტელევიზორი, კომპიუტერის მონიტორი და დააზიანა", — ნათქვამია უწყების განცხადებაში.

ნაციონალური მოძრაობის დეპუტატმა, რომან გოცირიძემ აღნიშნა, რომ ქართული ოცნება საარჩევნო კამპანიას ძალადობრივი მეთოდებით იწყებს და ეს გორში ოფისზე თავდასხმის მეოთხე შემთხვევაა.

საქმეზე გამოძიება სისხლის სამართლის კოდექსის 187-ე მუხლის 1 ნაწილით მიმდინარეობს, რაც სხვისი ნივთის დაზიანებას ან განადგურებას გულისხმობს. დანაშაული 1-დან 3 წლამდე თავისუფლების აღკვეთას ითვალისწინებს.