პარლამენტის თავმჯდომარემ, არჩილ თალაკვაძემ მოუწოდა ოპოზიციას, რომ სიმბოლურად მაინც მიიღონ მონაწილეობა საარჩევნო სისტემის ცვლილებაში და ფრაქციიდან რამდენიმე ადამიანმა მაინც მისცეს ხმა კანონპროექტს. მისი თქმით, დანარჩენ წევრებს შეუძლიათ პროტესტი გააგრძელონ, ოპოზიცია კი ამ ფორმით პასუხისმგებლიან მიდგომას გამოიჩენს.

"თუ ისინი თვლიან, რომ მათთვის მართლაც პრინციპულია ბატონი რურუას საკითხი, გამოყონ ადამიანები თავისი ფრაქციიდან, ვინც დაუჭერს მხარს, რათა სიმბოლურად მათი მხარდაჭერა ამ სერიოზული პასუხისმგებლობის ინიციატივის მიმართ დაფიქსირდეს; მაგრამ ამავე დროს, მათ შეუძლიათ დაიტოვონ პროტესტის სიმბოლოდ ის, რომ ფრაქციის დანარჩენმა წევრებმა ამას მხარი არ დაუჭირეს. მინიმუმ ეს იქნებოდა პასუხისმგებლობიანი მიდგომა", — განაცხადა მან რუსთავი 2-ის ეთერში.

იურიდიულ საკითხთა კომიტეტმა საარჩევნო სისტემის ცვლილებასთან დაკავშირებით საკონსტიტუციო ცვლილებებს მხარი დაუჭირა. ცვლილებების დამტკიცების შემთხვევაში, შემდეგი მოწვევის პარლამენტში 30 დეპუტატს მაჟორიტარულით, ხოლო 120-ს პარტიული, პროპორციული სიით აირჩევენ.

აღნიშნული კანონპროექტს პირველი მოსმენით კენჭს კვირას, 21 ივნისს ჩანიშნულ სესიაზე უყრიან. იმისათვის, კონსტიტუციაში ცვილებები შევიდეს, მას 113 დეპუტატის მხარდაჭერა სჭირდება. როგორ ცნობილია, ცვლილებებს მხარს დაუჭერს უმრავლესობის 92 დეპუტატი. ასევე, დამოუკიდებელი და პატრიოტთა ალიანსის დეპუტატები.

ევროპულ საქართველოსა და ნაციონალურ მოძრაობაში კი აცხადებენ, ისინი მხარს არ დაუჭერენ ცვილელებს, თუ მთავარი არხის მეწილეს, გიორგი რურუას პატიმრობიდან არ გაათავისუფლებენ.

120/30-ზე საარჩევნო სისტემაზე ოპოზიცია და მმართველი გუნდი 8 მარტს, ხანგრძლივი მოლაპარაკებების შემდეგ შეთანხმდნენ. მხარეებს შორის დიპლომატების შუამავლობით მოლაპარაკებები მას შემდეგ დაიწყო, რაც ბიძინა ივანიშვილმა 24 ივნისს გაცემული პირობა არ შეასრულა და ქვეყანა სრულად პროპორციულ სისტემაზე არ გადავიდა.