პრემიერ მინისტრი გიორგი გახარია ამბობს, რომ შს მინისტრად მუშაობის დროს დაინახა "ქართული ოცნების ჰუმანურობის ხარისხი". პირველ არხთან ინტერვიუში მანვე აღნიშნა, რომ ხშირ შემთხვევაში ჰუმანურობის ეს ხარისხი ეფექტიანობას აზიანებდა.

"შსს მინისტრობის პოზიციაზე დავინახე ჰუმანურობის ის ხარისხი, რომელიც ქართულმა ოცნებამ მოიტანა ამ ქვეყანაში. ხშირ შემთხვევაში ჰუმანურობის ეს ხარისხი ეფექტიანობას უფრო აზიანებდა. მაგრამ წინა წლების დროს იმდენად დათრგუნული იყო საზოგადოება, სოციალური ქსოვილი, რომ ჰუმანურობის ეს ხარისხი აუცილებელი ჟანგბადი იყო, რომ ადამიანს სრულფასოვან მოქალაქედ ეგრძნო თავი", — ამბობს გახარია.

გასული წლის ზაფხულში შს მინისტრ გიორგი გახარიას გადადგომას ითხოვდნენ 20 ივნისის საპროტესტო აქციის არაჰუმანურად, ძალადობრივი გზებით დაშლის გამო.

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ და მათ წინააღმდეგ გამოძიებას აწარმოებს.