პრემიერმინისტრი, გიორგი გახარიას 20 ივნისის 1 წლის თავზე დაგეგმილ აქციასთან დაკავშირებით ამბობს, რომ ქვეყანაში გამოხატვის თავისუფლება გარანტირებულია.

"საქართველოში გამოხატვის თავისუფლება არის სრულად დაცული. განსაკუთრებით წესების დაცვით თუ იქნება ეს ყველაფერი და არავის არ მოუვა აზრად რაღაც ექსტრემალური ნაბიჯების გადადგმა, რა თქმა უნდა, გამოხატვის თავისუფლება არის გარანტირებული", — განაცხადა გახარიამ.

მოძრაობა სირცხვილია 20 ივნისიდან 1 წლის თავზე რუსთაველზე აქციის გამართვას გეგმავს. ორგანიზატორების განცხადებით, აქცია წესებისა და რეკომენდაციების დაცვით გაიმართება.

მათი თქმით, ხელისუფლების ქმედებები 1 წლის თავზეც სირცხვილია. მათივე განცხადებით, ხელისუფლებამ საკუთარ შეცდომაზე სწავლის ნაცვლად, გამოცხადებული ომი კიდევ უფრო გაამწვავა და თავისუფალ აზრს დაუპირისპირა როგორც ადმინისტრაციული რესურსი, ასევე მის მიერ მართული მედია და ასეულობით ყალბი ანგარიში სოციალურ ქსელში.

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ და მათ წინააღმდეგ გამოძიებას აწარმოებს.