პირბადის წესების დარღვევის შესახებ კანონპროექტს პარლამენტში პირველი მოსმენით დაუჭირეს მხარი. დღეს, 10 ივნისის პლენარულ სხდომაზე პროექტი იურიდიულ საკითხთა კომიტეტის თავმჯდომარემ, ანრი ოხანაშვილმა წარადგინა.

კანონპროექტის თანახმად, დახურულ საჯარო სივრცეში თავშეყრისას, პირბადის ტარების წესის დარღვევა გამოიწვევს ფიზიკური პირის დაჯარიმებას 20 ლარით, ხოლო იურიდიული პირის — 500 ლარით. ამასთან, პირბადის ტარება სავალდებულოა საზოგადოებრივი ტრანსპორტით გადაადგილების დროსაც.

გარდა ამისა, პროექტში გაწერილია ისიც, რომ ქორწილის, იუბილეს, ქელეხის და სხვა მასშტაბური ღონისძიებების გადახდის შემთხვევაში, ფიზიკური პირები 2 000 ლარით, ხოლო იურიდიული პირები 10 000 ლარით დაჯარიმდებიან.

პარლამენტის თავმჯდომარის, არჩილ თალაკვაძის განცხადებით, მოსმენის ფარგლებში უნდა ამოიწუროს ყველა კითხვა და ისეთი რეგულაციები გაიწეროს, რომელიც გაუგებრობებს მინიმუმამდე შეამცირებს.