ახალქალაქის, კუმურდოს და კარის მიტროპოლიტმა ნიკოლოზ ფაჩუაშვილი აცხადებს, რომ მეუფე ანტონის განცხადებები არა ევროპულ ღირებულებებს, არამედ მის "გაყალბებასა და ტრანსფორმაციას" ეხებოდა, რაც იგივე ტელევიზიებიდან ხშირად ისმის. ამ თემაზე მან სოფო ზურაბიანის პოლიტიკის ფორმულაში ისაუბრა.

"ჯერ ერთი, მეუფე ანტონმა თქვა, რომ სინოდზე დააყენებს საკითხს, რომ ჩვენ არ ვპასუხობთ ამ ბრალდებებს, ცილისწამებას, რომლებიც ძალიან ხშირად გაისმის ტელევიზიის მხრიდან და უპასუხოდ რჩება. ეს საშუალებას აძლევს იმ ხალხს ვინც ამას აკეთებს, რომ განავითაროს და განავითაროს", — თქვა ნიკოლოზ ფაჩუაშვილმა.

მისი თქმით, განმარტებით მეუფე ანტონის განცხადება მიმართვა და გამოწვევაა იმ ადამინების მიმართ, რომლებიც "ნამდვილი" ევროპული ღირებულებების ნაცვლად ფსევდო ღირებულებებს გვთავაზობენ.

"ვერაფრით ამ ადამიანმა, მეუფე ანტონმა თქვენი ყურადღება ვერ მიიქცია და ახლა ისეთი რაღაცა თქვა, ისეთი ამბავია ატეხილი. [...] ისეთი ნაბიჯი გადადგა ამ ადამიანმა", — თქვა მიტროპოლიტმა.

მეუფე ანტონმა ჰომოფობიური განცხადება გააკეთა და თქვა, რომ ეკლესიაზე ორკესტრირებულ შეტევას ის ადამიანები და ორგანიზაციები ახორციელებენ, რომლებიც ლგბტ ადამიანების უფლებებს იცავენ. მისი თქმით, ებადება ეჭვი, რომ ევროატლანტიკურ გზას და არჩევანს უნდა გადახედონ. მეუფე ანტონმა განაცხადა, ფიქრობს ეს საკითხი სინოდის სხდომაზე დააყენოს.