ქართული ოცნების დეპუტატის, დავით მათიკაშვილის ცოლი უვადო მოსამართლე გახდა. ნინო მამულაშვილი იუსტიციის უმაღლესმა საბჭომ სამწლიანი გამოსაცდელი ვადის გასვლის შემდეგ, თბილისის საქალაქო სასამართლოს სამოქალაქო საქმეთა კოლეგიაში უვადოდ დანიშნა.

მამულაშვილი სასამართლოებში სხვადასხვა თანამდებობაზე მანამდეც მუშაობდა, თუმცა მოსამართლე 2017 წელს გახდა, მას შემდეგ, რაც დავით მათიკაშვილი პარლამენტის წევრად აირჩიეს.

იუსტიციის უმაღლესი საბჭოს არამოსამართლე წევრის, ნაზი ჯანეზაშვილის ინფორმაციით, ვიდრე მოსამართლე გახდებოდა, მამულაშილი იუსტიციის უმაღლესი საბჭოს მიერ გამოცხადებულ კონკურსში 3-ჯერ მონაწილეობდა, თუმცა იუსტიციის უმაღლესმა საბჭომ სამივეჯერ უარი უთხრა მოსამართლის თანამდებობაზე გამწესებაზე. ჯანეზაშვილი მათიკაშვილის ცოლის დანიშვნას სასამართლოში "კლანს" უკავშირებს.

"2016 წლის საპარლამენტო არჩევნების შემდგომ, მას შემდეგ, რაც დავით მათიკაშვილი გახდა მეცხრე მოწვევის პარლამენტის წევრი, რამდენიმე თვეში ნინო მამულაშვილმა იუსტიციის უმაღლესი საბჭოს მხარდაჭერა მოიპოვა და მეოთხე მცდელობის შემდეგ გახდა მოსამართლე. ცხადია ეს გარემოება აჩენს კითხვას, რატომ დაინიშნა ნინო მამულაშვილი მოსამართლის თანამდებობაზე რამდენიმეწლიანი მცდელობის შემდეგ, მხოლოდ მაშინ, როდესაც მისი მეუღლე გახდა საქართაველოს პარლამენტის წევრი და ამძაფრებს ეჭვებს დავით მათიკაშვილის კავშირზე სასამართლოს ე.წ. კლანთან", — ამბობს ჯანეზაშვილი.

ის ასევე აღნიშნავს, რომ ასეთი შემთხვევები იუსტიციის უმაღლესი საბჭოს გადაწყვეტილებების მიუკერძოებლობასთან დაკავშირებით ეჭვებს კიდევ უფრო ამძაფრებს.

"სასამართლოს დამოუკიდებლობა ინდივიდუალური მოსამართლის დამოუკიდებლობით იწყება. თუ არ არის ინდივიდუალური მოსამართლე დამოუკიდებელი, კომპეტენტური და ანგარიშვალდებული ხალხის წინაშე, ის ვერასოდეს იქნება მთლიანად სასამართლოს ინსტიტუციური დამოუკიდებლობის გარანტი", — აღნიშნავს ჯანეზაშვილი.