ქართული ოცნების ერთ-ერთი ლიდერი, ირაკლი კობახიძე ამბობს, რომ ისეთი "გოიმური" ოპოზიციური სპექტრი, როგორიც დღესაა, საქართველოს ისტორიაში არ ახსენდება. ამ თემაზე მან POS TV-ს ეთერში ისაუბრა.

"ზოგადად თუ გადაავლებთ თვალს, ელემენტარულად, ვიზუალურად თუ გადახედავთ სურათს, რომელიც არის ჩამოყალიბებული ლეიბორისტული პარტიის ოფისში ყველაფერი ნათელი ხდება. ასეთი მარგინალური, უხეში ტერმინი არ მინდა გამოვიყენო, ასეთი გოიმური, კიდევ უფრო გავამძაფრებდი, მე არ მახსენდება საქართველოს ისტორიაში", — თქვა ირაკლი კობახიძემ.

კობახიძის თქმით, ოპოზიციის საერთო ნიშანი ისაა, რომ ყველას თავისი ცოდვა აქვს და ყველას აქვს რაღაც "გაფუჭებული", თუმცა, მისი შეფასებით, ეს სპექტრი საკმაოდ ჭრელია. კობახიძის აზრით, გაერთიანებულ ოპოზიციას წარმატების არანაირი რესურსი არ აქვს.