თბილისის მერის, კახა კალაძის განცხადებით, თბილისსა და რუსთავს შორის საზოგადოებრივი ტრანსპორტი იმოძრავებს.

ამის შესახებ მერმა მთავრობის სხდომაზე განაცხადა. მისივე თქმით, პროექტზე პასუხისმგებლობას თბილისის მუნიციპალიტეტი აიღებს. როდის დაიწყება საზოგადოებრივი ტრანსპორტის მოძრაობა ორ ქალაქს შორის ჯერ უცნობია.

"ბევრი წერილი შემოდის ახალგაზრდების მხრიდან, რომ პრობლემა, რომელიც არსებობს ტრანსპორტის მიმართულებით თბილისი-რუსთავის გზაზე, წარმოადგენს სერიოზულ პრობლემას და სერიოზულ დისკომფორტს იმ ადამიანებისთვის, ვისაც ყოველდღიურად უწევს რუსთავიდან თბილისში ჩამოსვლა და, პირიქით, რუსთავიდან თბილისში ჩასვლა", — აღნიშნა მერმა.

კახა კალაძემ თავის მოადგილეს, მაია ბითაძეს დაავალა, წარადგინოს გეგმა, თუ როგორ იმოძრავებენ ავტობუსები ორ ქალაქს შორის.

"თბილისი-რუსთავის მიმართულებით იმოძრავებს განახლებული, ახალი ავტობუსები ისეთი, როგორიც ემსახურება თბილისის მოსახლეობას", — თქვა მერმა.