ინფექციური საავადმყოფოს დირექტორი, თენგიზ ცერცვაძე აცხადებს, რომ კორონავირუსის სამკურნალოდ გამოჯანმრთელებული პაციენტების პლაზმის შეგროვება უკვე დაიწყეს, ახლა კი შესაფერისი პაციენტი უნდა გამოჩნდეს.

როგორც ცერცვაძე განმარტავს, პლაზმით მკურნალობისთვის უნდა იყოს მძიმე პაციენტი, სადაც სხვა მედიკამენტებმა ეფექტი არ მისცა. ამასთან უნდა დაემთხვას სისხლის ჯგუფი და სხვადასხვა პარამეტრები. მისივე თქმით, პლაზა მასიური მკურნალობის მეთოდი ვერ გახდება.

"საქართველოში სულ არის 160 გამოჯანმრთელებული. ამ 160 ადამიანიდან ყველა სისხლის დონორად არ გამოდგება. უნდა გაისინჯოს ყველა დონორის სისხლის და ვისაც გამოუმუშავდა ძლიერი იმუნიტეტი და ვისაც სისხლში აქვს დამცავი ანტისხეულების დიდი კონცენტრაცია, მხოლოდ მათი პლაზმა გამოდგება სამკურნალოდ. ასეთი, ჩვენი წინასწარი მონაცემიდან, 20-დან ერთია. პოტენციურად, რვა დონორი შეიძლება გვყავდეს. ამიტომ ამ მეთოდს ცალკეულ შემთხვევებში გამოვიყენებთ", — აღნიშნა ცერცვაძემ.

ვირუსულ ინფექციასთან გასამკლავებლად პაციენტებს COVID-19-ისგან გამოჯანმრთელებული დონორი პაციენტების პლაზმა ჩინეთში გადაუსხეს, რომელიც SARS-COV-2 ვირუსის გამანეიტრალებელი ანტისხეულების მაღალ კონცენტრაციას შეიცავდა. მკურნალობის კურსი 10-მა პაციენტმა გაიარა, მათი ასაკი 34-დან 78 წლამდე მერყეობდა.

პლაზმური თერაპიის დაწყებიდან 3 დღის განმავლობაში, COVID-19-ისგან გამოჯანმრთელებული დონორების სისხლიდან აღებულმა პლაზმამ პაციენტებში კლინიკური სიმპტომები, მაღალი ტემპერატურა, ტკივილი გულ-მკერდის არეში და ხველება მნიშვნელოვნად შეამსუბუქა.

პლაზმის გადასხმიდან 7 დღის განმავლობაში პაციენტების ფილტვებზე არსებულმა დაზიანებებმა ზომაში დაპატარავება დაიწყო. 7 დღის შემდეგ კი ორგანიზმში ვირუსი აღარ ფიქსირდებოდა.