"მე როგორც პარლამენტის თავმჯდომარე, ამ თანამდებობაზე არჩევის შემთხვევაში ვიქნები ვალდებული და ამ ვალდებულებას პირნათლად შევასრულებ, რომ თითოეულ დეპუტატს, თითოეულ პარლამენტის წარმომადგენელს, თითოეულ პოლიტიკუ ძალას მივცე საპარლამენტო პროცესებში, საპარლამენტო მუშაობაში მონაწილეობის სათანადო შესაძლებლობა. მე ვარ მონდომებული, რომ მაქსიმალურად კონსტრუქციული თანამშრომლობა უზრუნველვყო პარლამენტის წარმომადგენელ დეპუტატებს შორის." - ეს განცხადება პარლამენტის თავმჯდომარეობის კანდიდატმა, ირაკლი კობახიძემ მე-9 მოწვევის პარლამენტის პირველ სხდომაზე გააკეთა.

კობახიძემ ენმ-ის დეპუტატების კითხვებსაც უპასუხა, რომლებიც წინასაარჩევნო პერიოდს, ლარის კურსსა და რუსთავი 2-ის საქმეს შეეხებოდა.

კობახიძის თქმით, "სიმძაფრემ", რომელიც მის განცხადებებში იკვეთებოდა, მოსახლეობას სწორი არჩევანის საშუალება მისცა:

"პასუხს ვაგებ თითოეულ ამ განცხადების საფუძვლიანობაზე. რაც შეეხება განცხადებათა სიმძაფრეს, ეს სიმძაფრე იყო აუცილებელი იმ გარემოში, რომელიც ჩამოყალიბდა წინასაარჩევნო პერიოდში. აუცილებელი იყო მთელი სიმწვავით სიმართლის თქმა საქართველოს მოსახლეობისთვის და სწორედ ამ სიმართლემ მისცა ჩვენს მოსახლეობას სწორი არჩევანის გაკეთების შესაძლებლობა. იმ არჩევანის, რომლის შედეგიც არის დღევანდელი პარლამენტის შემადგენლობა.

რაც შეეხება რუსთავი 2-ის საქმეს, კობახიძემ ამ დავაზე კომენტირებისას განაცხადა, რომ ქართული ოცნების მიზანი იყო და არის მედია პლურარიზმის უზრუნველყოფა:

"ჩვენს კომპეტენციაში შედის საქართველოში მედია პლურარიზმის უზრუნველყოფა და როგორც არ უნდა განვითარდეს პროცესები, ჩვენი ამოცანა სწორედ ასეთად დარჩება."

კობახიძემ ისაუბრა ლარის კურსთან დაკავშირებითაც. მისი თქმით, პრობლემა მხოლოდ საქართველოში არ დგას და ის მთელ რეგიონს მოიცავს:

"ლარის კურსს რაც შეეხება, ეს არის, რა თქმა უნდა, ერთ-ერთი ყველაზე მტკივნეული პრობლემა, საკითხი, რომელიც ძალიან აწუხებს ჩვენს მოსახლეობას. ეს პრობლემა, რა თქმა უნდა, შეეხო ჩვენი მოსახლეობის ძალიან დიდ ნაწილს, თუმცა ეს არ არის მხოლოდ საქართველოს პრობლემა, თქვენ ხედავთ რა მდგომარეობაა ზოგადად რეგიონში. ეს პრობლემა აწუხებს ჩვენს სამეზობლოს მთლიანად. აბსოლუტურად ყველა ქვეყანას."