იმ ბრალდებულებს, ვისაც პროკურატურამ, კორონავირუსის პადემიის გამო, სატელეფონო ზარებზე არსებული შეზღუდვა 22 მაისამდე მოუხსნა, 15-წუთიანი უფასო სასაუბრო დრო მიეცათ.

ინფორმაციას ამის შესახებ პენიტენციური სამსახური ავრცელებს.

უწყებაში ამბობენ, რომ დღეის მდგომარეობით, პენიტენციურ სისტემაში საგამოძიებო ორგანოს მხრიდან სატელეფონო ზარებზე შეზღუდვა 300-მდე ბრალდებულს ჰქონდა დაწესებული. მათივე განმარტებით, ეს ადამიანები სწორედ ამ შეზღუდვის გამო ვერ მოხვდნენ იმ პატიმართა სიაში, ვისაც 22 აპრილს წითელი ჯვრის საერთაშორისო კომიტეტისგან საჩუქრად უფასო სასაუბრო დრო დაუფინანსდათ.

"მოხდა შეთანხმება პენიტენციური სისტემისთვის სატელეფონო მომსახურების მიმწოდებელ კომპანიასთან და თითოეულ ასეთ პატიმარს 26 აპრილიდან უკვე ექნება საშუალება 15-წუთიანი უფასო სასაუბრო დროით ისარგებლოს", — ამბობენ პენიტენციურ სამსახურში.

კორონავირუსის პანდემიის გამო, პენიტენციურ სისტემაში 5 მარტიდან განსაკუთრებული პირობები მოქმედებს და ყველანაირი პაემნის უფლება შეჩერებულია. იუსტიციის სამინისტროს ინფორმაციით, იმისთვის, რომ ბრალდებულებსა და მსჯავრდებულებს გარე სამყაროსთან ურთიერთობის დეფიციტი ნაწილობრივ დაუკომპენსირდეთ, ამ პერიოდში ყველა პატიმარს ყოველთვიურად 15-წუთიანი სასაუბრო დრო უფასოდ ეძლევა.