ფოთში, აღმაშენებლის ქუჩაზე, ხიდის სარეაბილიტაციო სამუშაოებისას შპს მურიმ შეცდომით სხვა ხიდის ჯებირი დაანგრია.

ფოთის მერის მოადგილემ ნიკა გრიგოლიამ On.ge-სთან საუბარში აღნიშნა, რომ კომპანია ტენდერით შეირჩა. მისივე თქმით, შპს მური დაზარალებულ ადგილს უახლოეს დღეებში საკუთარი ხარჯებით აღადგენს.

ფოთის მერიის თანამშრომლებმა On.ge-ს უთხრეს, რომ კომპანიამ სამუშაოები დამოუკიდებლად, მერიის წარმომადგენლების გარეშე დაიწყო:

„როგორც კი ზედამხედველობის სამსახურმა შენიშნა, რომ სამუშაოები არასწორად სრულდებოდა, მათ პროცესი შეაჩერეს“.

დაზიანებული ხიდის აღსადგენად კომპანიას 10 დღის ვადა აქვს.

შპს მური ფოთის მერიის მიერ გამოცხადებულ ტენდერში გამარჯვებულად 2016 წლის მარტში გამოვლინდა, ხელშეკრულება კი მასთან 6 აპრილს გაფორმდა. ხელშეკრულების ღირებულება 133 249 ლარია. აღებული ვალდებულების მიხედვით, განათება უნდა მოაწყოს ფოთში, აღმაშენებლის გამზირზე მდებარე ორ ხიდზე (აღმაშენებლის გამზირისა და რუსთაველის რკალის დამაკავშირებელი და აღამაშენებლის გამზირისა და 9 აპრილის ხეივნის კვეთაზე). ხელშეკრულებით ასევე გათვალისწინებულია უშუალოდ ხიდის რეაბილიტაცია, კონკრეტულად კი, ბეტონის მოაჯირების გამოცვლა, ხიდის კედლის მოპირკეთება და ა.შ.