საგარეო საქმეთა მინისტრის, დავით ზალკალიანის განცხადებით, თუ რუსეთი ავიამიმოსვლის აღდგენას გადაწყვეტს, ქართული მხარე ამას მხოლოდ მიესალმება. მისი განმარტებით, ავიამიმოსვლის შეწყვეტა ჩვენს ათობით მოქალაქეს ცხოვრებას ურთულებს და სავაჭრო-ეკონომიკურ ურთიერთობებზეც დადებითად არ აისახება.

"უნდა აღინიშნოს ასევე, რომ რუსეთის მოქალაქეებს საქართველოში არც ამ გადაწყვეტილების მიღების დროს და არც მას შემდეგ არანაირი საფრთხე არ ემუქრებოდათ, რასაც მილიონზე მეტი ვიზიტორი ადასტურებდა", — აღნიშნა ზალკალიანმა.

რაც შეეხება, სავაჭრო წარმომადგენლობების გახსნა, როგორც მინისტრი ამბობს, ასეთ ფორმას საქართველოს კანონმდებლობა არ ითვალისწინებს:

"შესაბამისად მიგვაჩნია, რომ სავაჭრო-ეკონომიკური პრობლემატიკის განხილვა უნდა გაგრძელდეს ე.წ. აბაშიძე-კარასინის ფორმატში, სადაც ამ მიმართულებით კონკრეტული, მნიშვნელოვანი შედეგებია მიღწეული. საჭიროების შემთხვევაში, შესაძლებელია თბილისსა და მოსკოვში, შვეიცარიის საელჩოების შემადგენლობაში არსებული საქართველოსა და რუსეთის ინტერესების სექციების პოტენციალის გამოყენებაც".

გარდა ამისა, ზალკალიანი აღნიშნავს, რომ დიპლომატიური ურთიერთობების აღდგენა გამორიცხულია, სანამ დეოკუპაციის მიმართულებით ქმედითი ნაბიჯები არ გადაიდგმება.

რუსეთის საგარეო საქმეთა მინისტრმა, სერგეი ლავროვმა იმედი გამოთქვა, რომ საქართველოსთან ავიამიმოსვლის აღდგენა მოხერხდება. გარდა ამისა, მან აღნიშნა, რომ ქურთული მხარის ინიციატივის შემთხვევაში მზად არიან დიპლომატიური ურთიერთობებიც აღადგინონ და საქართველოში სავაჭრო წარმომადგენლობაც გახსნან.