საქართველოს პრეზიდენტი, სალომე ზურაბიშვილი საოკუპაციო ძალების მიერ ბორდერიზაციის განახლებას ეხმაურება და ამბობს, როცა სამყარო საერთო მტერს ებრძვის, ისინი თავიანთი ნამდვილ სახის ჩვენებას განაგრძობენ. ამის შესახებ მან ტვიტერზე დაწერა.

"როცა სამყარო საერთო მტერს ებრძვის და საერთაშორისო სოლიდარობა აუცილებელი გახდა, საოკუპაციო რეჟიმი აგრძელებს და აძლიერებს პროვოკაციულ ქმედებებს საქართველოს ოკუპირებულ ტერიტორიებზე და გვაჩვენებს თავის ნამდვილ სახეს", — წერს ზურაბიშვილი.

ქარელში, სოფელ ტახტისძირის მიმდებარედ საოკუპაციო ძალებმა ე.წ. საზღვრის უკანონო გადმოწევა განაახლეს. საქართველოს საგარეო საქმეთა სამინისტრო აცხადებს, რომ ქარელში საოკუპაციო ძალების მიერ ხელოვნური ბარიერების აღმართვით მოსახლეობას სასოფლო-სამეურნეო მიწის ნაკვეთებზე წვდომა შეზღუდვა.

უწყება მოუწოდებს რუსეთს, დაუყოვნებლივ შეწყვიტოს პროვოკაციული და დესტრუქციული მოქმედებები და შეასრულოს ნაკისრი საერთაშორისო ვალდებულებები, მათ შორის, ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმება.

საგარეო საქმეთა სამინისტრო მიმართავს საერთაშორისო თანამეგობრობას, სათანადო შეფასება მისცეს და ქმედითი ზომები მიიღოს საოკუპაციო ხაზზე მიმდინარე უკანონო პროცესებთან დაკავშირებით.

ოკუპანტების ქმედებებს გამოეხმაურა სახელმწიფო მინისტრი ქეთევან ციხელაშვილიც. მისი თქმით, ამოქმედებულია ცხელი ხაზი და ინფორმირებულია ყველა საერთაშორისო პარტნიორი.