ბოდბელი მთავარეპისკოპოსი იაკობ იაკობიშვილი ვარაუდობს, რომ ხელისუფლება კორონავირუსს სპეციალურად ავრცელებს. მისი აზრით, მთავრობა ქუჩებში საგანგებო მდგომარეობისას დადგენილი წესების დაცვას სპეციალურად არ უზრუნველყოფს, რათა ვირუსი გავრცელდეს და შემდეგ ეკლესიას დააბრალონ.

"დღეს გამოსული ვიყავი ქალაქში, 12 საათამდე ვიარე. მთელს ქალაქში დავდიოდი და ვნახე. ის რიგები იყო? "სილიოტკები" ხომ არ ვართ, ისე რომ ჩაგვალაგონ, "კილკის" იმაში ხომ არა ვართ. სპეციალურად ავრცელებენ, რომ მერე ჩვენ დაგვაბრალონ? დღეს რატომ არ მიხედა ხელისუფლებამ? ყველგან არეულობა იყო და ყველამ მიხედოს თავის საქმეს", — განაცხადა მეუფე იაკობმა.

15 აპრილს, საქართველოს მთავრობამ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

მთავრობისა და საპატრიარქოს ერთობლიბი გადაწყვეტილებით, აღდგომის ღამეს დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება.ანდრია ჯაღმაიძის განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, რომ ყველა ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: