საერთაშორისო გამჭვირვალობა საქართველო 2016 წელს ქვეყანაში არსებულ კორუფციის გლობალური ბარომეტრის მონაცემებს აქვეყნებს, რომლის მიხედვითაც წვრილმანი კორუფციის დონე საქართველოში კვლავ დაბალია, თუმცა მთავრობის ანტიკორუფციულ პოლიტიკას მოსახლეობა არაეფექტურად მიიჩნევს.

კვლევის თანახმად, ქვეყნის სამ უმნიშვნელოვანეს პრობლემას შორის კორუფციას საქართველოში გამოკითხულთა 12% ასახელებს, ამ მაჩვენებლის სიმცირით საქართველო კვლევის ფარგლებში შესწავლილი 42 ქვეყნიდან მე-4 ადგილს იკავებს გერმანიის, შვედეთითს და შვეიცარიის შემდეგ.

ფოტო: TI

კორუფციის გლობალური ბარომეტრი საზოგადოებრივი აზრის ყველაზე ფართო კვლევაა, რომელიც კორუფციის მხრივ მოქალაქეთა გამოცდილებას ეხება და რეგულარულად ქვეყნდება 2002 წლიდან. 2016 წელს საერთაშორისო გამჭვირვალობა ამ კვლევას მეცხრედ აქვეყნებს.

კორუფციის გლობალური ბარომეტრის 2016 წლის რეგიონული კვლევის ფარგლებში საერთაშორისო გამჭვირვალობამ ევროპისა და ცენტრალური აზიის 42 ქვეყნის თითქმის 60 000 მოქალაქე გამოკითხა მათ ყოველდღიურ ცხოვრებაში კორუფციასთან დაკავშირებული გამოცდილების, სხვადასხვა სახელმწიფო ინსტიტუტში კორუფციის დონისა და მთავრობის ანტიკორუფციული პოლიტიკის ეფექტურობის თაობაზე.