თეოლოგი გოჩა ბარნოვი ამბობს, რომ საპატრიარქოს გაკრიტიკების გამო უცნობი ადამიანი მას თავს დაესხა. ამის შესახებ მან ტელეკომპანია ფორმულასთან ისაუბრა. ტელეკომპანიის ინფორმაციით, თეოლოგმა უკვე მიმართა სამართალდამცავებს. ბარნოვის თქმით, შემთხვევა 14 აპრილს მოხდა.

"მქონდა ინტერვიუ TV პირველთან მუხიანში, ჩემს სახლთან ახლოს. ინტერვიუს დასასრულის დროს, ჩემთან მოვიდა ვიღაც უცნობი ადამიანი. თუ არ ვცდები ნასვამი იყო. დამიწყო საუბარი იმაზე, თუ რატომ ვაძლევ ინტერვიუს და რა უფლებით ვაძლევ ინტერვიუს და რომ ეს ინტერვიუები აღარ უნდა მივცე, რატომ ვაკრიტიკებ საპატრიარქოს. მე მას ვკითხე, თუ ვინ იყო, რის შემდეგაც დამარტყა", — ამბობს გოჩა ბარნოვი.

გოჩა ბარნოვი საპატრიარქოს საჯაროდ ხშირად აკრიტიკებს. მათ შორის, მან გააკრიტიკა საპატრიარქოს გადაწყვეტილება იმასთან დაკავშირებით, რომ პანდემიის დროს სააღდგომო წირვას ტაძრებში მრევლიც დაესწრებოდა.

გუშინ, 15 აპრილს საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება.

ამის შესახებ ინფორმაცია საპატრიარქოს პრესსპიკერმა, ანდრია ჯაღმაიძემ და პრემიერ-მინისტრის პრესსპიკერმა, ირაკლი ჩიქოვანმა თანმიმდევრულად გააჟღერეს. ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

16 აპრილს ცნობილი გახდა, რომ საქართველოში კორონავირუსით კიდევ 30 ადამიანი დაინფიცირდა და მათი რაოდენობა ჯამში 336 გახდა. ბოლო მონაცემებით, საქართველოში კორონავირუსისგან გამოჯანმრთელებულია 74 პაციენტი, ხოლო გარდაცვლილია 3 ადამიანი, უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 000 პირი რჩება, სტაციონარში მეთვალყურეობის ქვეშ კი 494 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: