პარტია ახალი საქართველოს ლიდერი, გიორგი ვაშაძე ამბობს, რომ ხელისუფლება პანდემიის გამო შექმნილ ვითარებას იყენებს და ვალდებულების შესრულების დროს წელავს. ამ თემაზე მან მედიასთან გამარჯვებული საქართველოს ლიდერის, ირაკლი ოქრუაშვილის სასამართლო პროცესის შემდეგ ისაუბრა და აღნიშნა, რომ მასთან ერთად ყველა პოლიტიკური პატიმარი უნდა გათავისუფლდეს.

"რაც არ უნდა გაწელოთ, რაც არ უნდა გადაავადოთ, კორონავირუსი თქვენ ვერ გიშველით, აუცილებლად მოგიწევთ ამ პასუხისმგებლობის შესრულება. ოპოზიცია ამ მოთხოვნაში ერთიანია და ყოველმხრივ მუშაობას გააგრძელებს. აუცილებელად მივაღწევთ შედეგს, რო შესრულდეს შეთანხმების ყველა პუნქტი", — თქვა გიორგი ვაშაძემ.

ვაშაძემ აღნიშნა, რომ პატიმრების გათავისუფლებასთან დაკავშირებით, საზოგადოება და პოლიტიკური სპექტრი შეთანხმდა, მას კი გარანტად საერთაშორისო თანამეგობრობა უდგას.

დღეს, 13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორისა ნაცინალური მოძრაობის ერთ-ერთი ლიდერი ნიკა მელიაც, რომელიც განაჩენს ელოდება.