იუსტიციის მინისტრი თეა წულუკიანი უარყოფს, რომ საპატიმრო დაწესებულებაში ქალი პატიმრები შიმშილობენ. მთავარი არხის ინფორმაციით, 35-მა პატიმარმა ქალმა შიმშილი პრეზიდენტის შეწყალების აქტის გამო დაიწყო, რადგან მძიმე დანაშაულისთვის მსჯავრდებული პირები შეიწყალეს.

"დღეს ჩვენ გვაქვს ძალიან ჯანსაღი მდგომარეობა საპატიმროებში და, პირველ რიგში, ქალებთან. ეს არის ჩვენი კონტინგენტის ის ნაწილი, რომელიც არის, რა თქმა უნდა, ძალიან სენსიტიური და გარეთ მათ მოხუცი მშობლები, შვილები ელოდებიან, მაგრამ ყველაზე შეგნებული ნაწილიც", — აღნიშნა წულუკიანმა.

პრეზიდენტმა, სალომე ზურაბიშვილმა 9 მსჯავრდებული ქალი შეიწყალა. როგორც პრეზიდენტის ადმინისტრაციაში განმარტეს, ყველა მსჯავრდებულს ერთი, ან მეტი არასრულწლოვანი შვილი ჰყავდა და ძალადობრივი დანაშაულისთვის არ არიან გასამართლებული.