ნეპალში რამდენიმე საათის წინ გაუჩინარებული სამგზავრო თვითმფრინავის ნამსხვრევებს მთიან რეგიონში მიაკვლიეს. ბორტზე 21 ადამიანი იმყოფებოდა, სავარაუდოდ, ყველა მათგანი დაიღუპა. ინფორმაციას CNN ავრცელებს.

მცირეს ზომის სამგზავრო თვითმფრინავი ტვინ ოტერი Tara Air-ს ეკუთვნოდა. ნეპალის ტურიზმისა და ავიაციის მინისტრის ინფორმაციით, ნაპოვნია რამდენიმე ცხედარი, თუმცა, ისინი ჯერ იდენტიფიცირებულნი არ არიან.

თვითმფრინავი ნეპალის ჩრდილოეთით მდებარე ქალაქ ფოხარადან ქალაქ ჯომსომში მიფრინავდა, ფრენიც დრო ჯამში 19 წუთი უნდა ყოფილიყო, თუმცა, თვითმფრინავთან კონტაქტი აფრენიდან 8 წუთში დაიკარგა. მოგვიანებით, სამაშველო სამსახურებს ადგილობრივებმა შეატყობინეს ტყიდან კვამლისა და ცეცხლის ალის შესახებ, რის შემდეგ ჩამოვარდნილი თვითმფრინავიც იპოვეს.

ახალი თვითმფრინავი ტვინ ოტერი ატა ეარმა რამდენიმე თვის წინ კანადაში შეიძინა. აფრენის დროს კი ფრენისთვის ხელსაყრელი ამინდი იყო, შესაბამისად, ჯერჯერობით, კატასტროფის გამომწვევი მიზეზი უცნობია.

ფოხარა ნეპალის ერთ-ერთი ყველაზე პოპულარული ტურისტული ცენტრია, ხოლო რაც შეეხება ჯომსომს, სწორედ აქ გადის გზა ტურსიტებში ასევე პოპულარული ჰიმალაის მთებისკენ.

ანალოგიურ მარშრუტზე 2012 წელსაც ჩამოვარდა მცირე ზომის სამგზავრო თვითმფრინავი, რა დროსაც 15 ადამიანი დაიღუპა, 6 კი გადარჩა. იმ დროს ავიაკატასტროფის მიზეზი აგნი ეარის თვითმფრინავის ტექნიკური პრობლემა გახდა.