ოდესის გუბერნატორი, მიხეილ სააკაშვილი თანამდებობიდან გადადგა. ამის შესახებ მან რამდენიმე წუთის წინ გამართულ საგანგებო ბრიფინგზე განაცხადა და აღნიშნა, რომ უკრაინის კორუფციისგან გათავისუფლებისთვის ბრძოლას ისევ გააგრძელებს.

სააკაშვილის თქმით, მას სურს, რომ ოდესა ისე განვითარდეს, როგორც ბათუმი განვითარდა და გაიხსენა, რომ ამ უკანასკნელის კორუფციისგან გათავისუფლება ხელისუფლებამ მხოლოდ მას შემდეგ მოახერხა, რაც თავდაპირველად თბილისის გათავისუფლება შეძლო. შესაბამისად, ის მიიჩნევს, რომ ოდესაში არსებული კორუფციული სიტუაციის გამოსასწორებლად, თავდაპირველად მდგომარეობა კიევში უნდა გამოსწორდეს:

"ამიტომაც, ამ სიტუაციაში გადავწყვიტე თანამდებობიდან გადავდგე და ბრძოლის ახალი ეტაპი დავიწყო. მე არ დავიღლები და ნუ ექნებათ იმედი, რომ ჩემგან გათავისუფლდებიან. მე ის ჯარისკაცი ვარ, რომელიც მიდის, სანამ შეუძლია და შემდეგ იქამდე, სადამდეც საჭიროა. რამდენიც საჭიროა იმისთვის, რომ გავათავისუფლოთ უკრაინა ამ კორუფციული სიბინძურისგან. მათ უკრაინული რევოლუციის იდეას უღალატეს და მათი არსებობის ერთადერთი მოტივაცია ჯიბეების გასქელება, თავიანთი კლანების გაძლიერება და უკრაინის საბოლოოდ გაძარცვა. ვერ ეღირსებით!".

საქართველოს ყოფილმა პრეზიდენტმა განაცხადა, რომ უკრაინაში სხვადასხვა რაიონულ ხელმძღვანელებს ნეპოტიზმით ნიშნავენ თანამდებობზე. მან განმარტა, რომ ქვეყნის პრეზიდენტი მკვლელებისა და ბანდიტების კლანებს უჭერს მხარს:

მან გაიხსენა, რომ როდესაც პოროშენკოსთან ერთად საუბრობდა, რომ ცვლილებები იყო საჭირო, მან უპასუხა, რომ მას იაცენუკი და იანუკოვიჩი უშლიდნენ ხელს:

"ჩვენ დავეხმარეთ მას, გათავისუფლებულიყო იაცენუკისგან. და რით დამთავრდა ეს? იაცენუკის გუნდი ოდნავ ჩაწია პრეზიდენტის გუნდმა და იმავე სქემით განაგრძო ძარცვა, რომლითაც ძარცვავდნენ ისინი. არ ვაპირებ ამის მოთმენას, მე დავიღალე. ასე არავის არასდროს მოვუტყუებივარ".

დღესვე თანამდებობიდან გადადგა ოდესის პოლიციის უფროსი, გია ლორთქიფანიძეც და განმარტა, რომ ეს გადაწყვეტილება დამოუკიდებლად მიიღო.