ეკონომიკური და ჰუმანიტარული კრიზისის ფონზე ვენესუელის პრეზიდენტი, ნიკოლას მადურო ქალებს მოუწოდებს, ექვსი შვილი გააჩინონ. ამის შესახებ მადურომ ტელევიზიით განაცხადა, როდესაც ქალთა ჯანმრთელობის დაცვის ეროვნულ გეგმაზე საუბრობდა.

"ქვეყნის კეთილდღეობისთვის ყველა ქალმა უნდა გააჩინოს ექვსი შვილი", — განაცხადა მადურომ.

მადუროს მრავალშვილიანი დედების ინიციატივას კრიტიკა მოჰყვა. პარლამენტში ოპოზიციის წევრი მანუელ ბოლივარი ამბობს, რომ ქვეყნის დღევანდელ პირობებში შვილების გაჩენა და გაზრდა შეუძლებელია:

"საავადმყოფოები არ მუშაობს, ცოტა ვაქცინაა, დედები შვილებს ძუძუთი ვერ კვებავენ, რადგან შიმშილობენ ან ხელოვნური კვების საკვებს ვერ ყიდულობენ, რადგან მათთვის ხელმისაწვდომი არაა".

ბოლო წლების განმავლობაში ეკონომიკური კრიზისის გამო ქვეყანაში წამლებისა და საკვების დეფიციტია. Unicef-ის ინფორმაციით, 2013-2018 წლებში ვენესუელაში ბავშვების 13 პროცენტი შიმშილობს.

გარდა ამისა, ოპოზიციასა და ხელისუფლებას შორის ძალაუფლებისთვის ბრძოლამ აღნიშნული მდგომარეობა კიდევ უფრო მეტად დაამძიმა.

2019 წლის აქციების შემდეგ ოპოზიციის ლიდერი ხუან გუაიდო 50-ზე მეტმა ქვეყანამ ვენესუელის პრეზიდენტად აღიარა. თუმცაღა არმია მადუროს უჭერს მხარს და ის ჯერ კიდევ რჩება ხელისუფლების სათავეში.