ეკონომიკის მინისტრის, ნათია თურნავას თქმით, ქართული ოცნების მიერ ლობისტური კომპანიების დაქირავებით დასავლეთი ჭეშმარიტებას გაიგებს. მისი აზრით, ამ ფაქტს, მხოლოდ დადებითი შეფასება შეიძლება ჰქონდეს.

"მხოლოდ პოზიტიურად შეიძლება ეს შევაფასოთ, იმიტომ, რომ იმ ზღვა ინფორმაციაში, რაც მიეწოდება დასავლეთს და მთელ მსოფლიოს, ძალიან ბევრი არის არასწორი, უსამართლო. ეს არის ძალიან კარგი არხი, რომ სიმართლე ვუთხრათ მთელ მსოფლიოს იმაზე, თუ რა პროცესები მიმდინარეობს საქართველოში და მათ შორის, რა რეფორმებს ვახორციელებთ", — თქვა ნათია თურნავამ.

ქართულმა ოცნებამ ლობისტურ კომპანიებთან ხელშეკრულებების გაფორმება მას შემდეგ დაიწყო, რაც პრემიერ-მინისტრის სახელზე კონგრესმენებისა და სენატის წევრების კრიტიკული წერილები გამოქვეყნდა. ამერიკაში და სტრასბურგში ვიზიტებით იმყოფებოდნენ სამთავრობო გუნდის წარმომაგდენლებიც.

გუშინ, 13 თებერვალს ცნობილი გახდა, რომ ქართულმა ოცნებამ ამერიკულ ლობისტურ კომპანია DCI Group AZ, L.L.C.-ს თვეში $33 333-ს გადაუხდის. პარტიიდან დოკუმენტს ხელს აწერს აღმასრულებელი მდივანი, დეპუტატი ირაკლი კობახიძე.

დოკუმენტში წერია, რომ კომპანიამ პარტია ქართული ოცნება უნდა წარმოაჩინოს, როგორც სანდრო, პრაგმატული, დასავლეთის ლიბერალური იდეალებისა და დემოკრატიის ერთგული პარტნიორი.