ევროპარლამენტის წევრი, რასა იუკნიავიჩინე აცხადებს, რომ საქართველოს მეგობრებს შორის არსებობს შეშფოთება და იმედგაცრუება, ბოლო დროს განვითარებული მოვლენების გამო. ამით ის ოპოზიციონერი გიგი უგულავას დაკავებას გამოეხმაურა.

ევროდეპუტატმა ფორმულასთან ექსკლუზიურ ინტერვიუში თქვა, რომ საქართველოში ვითარება ისე ცუდი აქამდე არ ყოფილა, როგორც ახლა ჩანს.

"არსებობს შეშფოთება, იმედგაცრუება. მე პირადად მიჩნდება კითხვა, აღელვებს თუ არა ბიძინა ივანიშვილს ქვეყნის პროევროპული გზა და არის თუ არა მისთვის მნიშვნელოვანი ევროპული ღირებულებები. მისი ბოლო ნაბიჯი პროვოკაციული იყო. რა თქმა უნდა, ყველა ფაქტს დეტალურად შევისწავლით, მაგრამ როგორც ჩანს, სასამართლოს იყენებენ ოპოზიციის წინააღმდეგ. ამას არაფერი აქვს საერთო არც დემოკრატიასთან და არც კანონის უზენაესობასთან. დიახ, ვშიშობ, რომ ამგვარი პროვოკაციული ნაბიჯები დააზიანებს საქართველოს იმიჯს. ჩვენ ნაწყენი ვართ. როგორც საქართველოს მეგობრები კარგ ამბებს ველოდით. ცუდი ამბები მხოლოდ თქვენს დიდ მეზობელს ახარებს", — ამბობს ევროპარლამენტარი ფორმულას თარგმანის მიხედვით.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".