ქართული ოცნების დეპუტატი, დიმიტრი ხუნდაძე ამბობს, რომ თუკი მმართველი გუნდი ოპოზიციას თამაშში აყვება და 100/50-ზე მეტ კომპრომისზე წავა, მაჟორიტარები ისევ "მუხრუჭს გამოიყენებენ". ხუნდაძის თქმით, 100/50-ზე შეთავაზება არის ის უკიდურესი კომპრომისი, "რომლის იქეთაც გარდაუვალი კრიზისია".

"ოპოზიციამ, პასუხისმგებლობასთან ერთად, სერიოზულობაც დაკარგა და დაიწყო ციფრებით თამაში. რაც დრო გადის, კიდევ უფრო მიღრმავდება ეჭვი, რომ მათ უნდათ იმდაგვარი შემოთავაზებები, რომელსაც შედეგი არ ექნება და გადავლენ მათთვის სასურველ რევოლუციურ სცენარზე", — ამბობს ხუნდაძე.

მოლაპარაკებების მეხუთე რაუნდისთვის ოპოზიცია ქართული ოცნებისთვის 100/50-ის ალტერნატიული წინადადების შეთავაზებას აპირებს. გავრცელებული ინფორმაციით, სავარაუდოდ ოპოზიციური პარტიები მმართველ გუნდს მაჟორიტარი დეპუტატების რიცხვის კიდევ უფრო შემცირებას შესთავაზებენ.

მას შემდეგ, რაც ბიძინა ივანიშვილმა პირობა არ შეასრულა და ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გაერთიანდნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

მმართველ გუნდსა და ოპოზიციას შორის საარჩევნო სისტემასთან დაკავშირებით დიპლომატების მედიატორობით მოლაპარაკებების ფორმატი დაიწყო. მოლაპარეკებათა ოთხი რაუნდი უკვე გაიმართა. მმართველმა გუნდი ოპონენტებს ახალ სამოქმედო გეგმას სთავაზობს. საუბარია იმაზე, რომ პარლამენტში პროპორციული წესით 100 დეპუტატი აირჩიონ, ნაცვლად 77-სა. ხოლო მაჟორიტარული მანდატები 50-მდე შემცირდება.