ქართული ოცნების თავმჯდომარე ბიძინა ივანიშვილი და მისი ცოლი, ეკატერინე ხვედელიძე აშშ-ს ახალ ელჩს, კელი დეგნანსა და მის ქმარს, დუგლას მორისს ბიზნეს ცენტრში შეხვდნენ.

როგორც პარტიის პრესსამსახური აცხადებს, შეხვედრა გაცნობითი ხასიათის იყო და მათ ქართულ-ამერიკულ ურთიერთობებზე, აშშ-საქართველოს შორის სტრატეგიულ პარტნიორობასა და სამომავლო თანამშრომლობაზე ისაუბრეს.

ფოტო: ქართული ოცნება

ფოტო: ქართული ოცნება

დეგნანის წინამორბედს, ელჩ იან კელის უფლებამოსილების ვადა 2018 წლის მარტში ამოეწურა, მას შემდეგ, წელიწადზე მეტი აშშ-ს საქართველოში ელჩი არ ჰყავდა და მოვალეობას ელიზაბეთ რუდი ასრულებდა. დეგნანის კანდიდატურა ამერიკის პრეზიდენტმა, დონალდ ტრამპმა კონგრესს 2019 წლის სექტემბერში წარუდგინა. დეკემბერში კი სენატმა ის ელჩად დანიშნა, იანვარში კი მან ელჩის ფიცი დადო.

კელი დეგნანი ევროპასა და აფრიკაში აშშ-ს სამხედრო საზღვაო ძალების სარდლის პოლიტიკური მრჩეველი იყო. მანამდე ის კოსოვოსა და იტალიაში აშშ-ს დიპლომატიური მისიის ხელმძღვანელის მოადგილედ მუშაობდა. ასევე, ნატოში აშშ-ს წარმომადგელობაში იყო პოლიტიკური მრჩეველი და თურქეთში აშშ-ს საელჩოში პოლიტიკური მრჩეველის მოადგილე.

კელი დეგნანი უკვე შეხვდა საქართველოს პრეზიდენტ სალომე ზურაბიშვილსა და პარტრიარქს, ილია მეორეს.