ქართული ოცნების აღმასრულებელი მდივნის, ირაკლი კობახიძის ინფორმაციით, გორში ენმ-ისა და ქართული ოცნების აქტივისტები ერთმანეთს დაუპირისპირდნენ. მის თქმით, ნაციონალური მოძრაობის აქტივისტმა ქართული ოცნების მხარდამჭერებს აგინა და პირველად ფიზიკური შეურაცხყოფაც სწორედ მან მიაყენა:

"ნაციონალური მოძრაობის კანდიდატის ერთ-ერთი წარმომადგენელმა ძალიან მძიმე პროვოკაციაზე სცადა ჩვენი აქტივისტების წამოკიდება. საარჩევნო უბანთან იყვნენ ჩვენი აქტივისტები მობილიზებული და მან დაიწყო ძალიან მძიმე ფორმით შეურაცხყოფის მიყენება ჩვენი აქტივისტებისათვის. აქ საუბარია გინებაზე ძალიან უწმაწური ფორმით, სხვადასხვა ფორმით იყო ეს ყველაფერი გამოხატული. ამას მოჰყვა ორმხრივი ინციდენტი. ხაზგასმით აღვნიშნავ, რომ პირველად ფიზიკურ დაპირისპირებაში ჩვენს აქტივისტებთან შევიდა ალბერტ მერებაშვილი, რომელმაც დაარტყა ჩვენს ერთ-ერთ აქტივისტს. ამას მოჰყვა ორმხრივი ჩხუბი. რომლის პირობებშიც დაშავდნენ ადამიანები ორივე მხარეს, მათ შორის დაშავებულია თავად ალბერტ მერებაშვილიც."

კობახიძის ინფორმაციით, ენმ-ის აქტივისტი ალბერტ მერებაშვილი სპორტსმენი და თბილისის კუდის ყოფილი უფროსის რევაზ შიუკაშვილის დის შვილია.

კობახიძე მხარდამჭერებს თავის შეკავებისკენ მოუწოდებს და სთხოვს, რომ პროვოკაციის შემთხვევაში სამართალდამცავ ორგანოებს დაუკავშირდნენ:

"ჩვენ მოვუწოდებთ ჩვენ მხარდამჭერებს, ჩვენს აქტივისტებს - მაქსიმალურად შეიკავონ თავი ასეთ ინციდენტებში მონაწილეობისგან, არავითარ შემთხვევაში არ აყვნენ არც ერთ პროვოკაციას. როგორც კი ისინი დაინახავენ, რომ ასეთი ტიპის პროვოკაციას აქვს ადგილი, ისინი მაშინვე უნდა დაუკავშირდნენ სამართალდამცავ ორგანოებს. ჩვენი აქტივისტების საქმე არ არის ინციდენტებში შესვლა, პროვოკაციებზე აყოლა. ეს არის სამართალდამცავი ორგანოების საქმე - ინციდენტების განმუხტვა და ინციდენტების პრევენცია."

აღნიშნულ ინციდენტზე კომენტარი გააკეთა ენმ-ის წევრმა თინათინ ბოკუჩავამაც:

"ნაცემია ალბერტი მერაბიშვილი, რომელიც წარმოადგენდა ორგანიზაციას ევროპელი ახალგაზრდა მომავლისთვის. ეს ადამიანი სცემეს გორის საკრებულოს წევრმა, კობა ბერიანიძემ და მასთან დაკავშირებულმა ადამიანებმა. იგი ძალიან მძიმედ არის ნაცემი, არსებობს ფოტო მასალა, რომელიც ადასტურებს ამას".

ირაკლი კობახიძე ინციდენტის დროს ბერიანიძის ადგილზე ყოფნას ადასტურებს.