დღეს, იტალიაში მომხდარ მიწისძვრასთან დაკავშირებით საქართველოს საგარეო საქმეთა სამინისტრო, იტალიაში მცხოვრები საქართველოს მოქალაქეებისთვის განცხადებას ავრცელებს.

სამინისტრო მოუწოდებს იტალიაში მყოფ საქართველოს მოქალაქეებს, საჭიროების შემთხვევაში დაუკავშირდნენ საკონსულო დაწესებულებას. უწყების ცნობით ქ. რომში საქართველოს საელჩოში 24 საათიან რეჟიმში მოქმედებს ცხელი ხაზი: (+39 333) 887 91 23.

საქართველოს საგარეო საქმეთა სამინისტროს საკონსულო დეპარტამენტში ასევე მოქმედებს 24 საათიანი ცხელი ხაზი: (+995 32) 294 50 50.

ძლიერი მიწისძვრა ცენტრალურ იტალიაში მოხვდა. მიწისძვრის ეპიცენტრი ისტორიული დასახლება ნორჩადან 6 კილომეტრში იყო. აშშ-ს გეოლოგიური კვლევების სამსახურის ინფორმაციით, მიწისძვრა ადგილობრივი დროით დილის 7 საათსა და 40 წუთზე მოხდა (თბილისის დროით 10:40). მიწისქვეშა ბიძგების სიმძლავრემ 6,6 მაგნიტუდა შეადგინა.

ამ დროისთვის არსებული ინფორმაციით, ნორჩაში მიწისძვრამ დაანგრია წმინდა ბენედიქტეს ბაზილიკა და სხვა არაერთი ისტორიული ნაგებობა.