ეკონომიკის მინისტრის, ნათია თურნავას განცხადებით, მიუხედავად იმისა, რომ ამერიკელი პარტნიორების კრიტიკა ბოლო პერიოდში გადაუმოწმებელ ინფორმაციას ეყრდნობა, ისინი მაინც ყურადღებას აქცევენ მათ. ასე უპასუხა მან სენატორების ახალი კრიტიკული წერილის შესახებ დასმულ კითხვას.

"ჩვენთვის ყოველთვის ყურადსაღებია დასავლელი პარტნიორების, ხელისუფლების სხვადასხვა შტოს წარმომადგენლების, ესა თუ ის განცხადება. მიუხედავად იმისა, რომ ზოგჯერ, ამ ბოლო პერიოდში განსაკუთრებით, გადაუწმომებელ და არასწორ ინფორმაციას ეყრდნობა ეს განცხადებები. ჩვენ ყურადღებით ვეცნობით და შესაბამისი რეაგირებაც მოყვება ამას", — განაცხადა მინისტრმა.

ახალ კრიტიკულ წერილში, რომელიც ამჯერად სენატის საგარეო ურთიერთობათა კომიტეტის წევრებმა გამოუგზავნეს მთავრობას, ხაზგასმულია, რომ საქართველოსა და აშშ-ის პარტნიორობა შესაძლოა კითხვის ნიშნის ქვეშ დადგეს. მიზეზად სენატორები ბოლოდროინდელ მოვლენებს ასახელებენ, რომლებმაც მათი თქმით, კითხვები გააჩინა საერთო ღირებულებების არსებობაზე. გარდა ამისა, წერილში, სენატორები შეშფოთებას გამოთქვამენ საარჩევნო რეფორმის დაპირებისა და უკან წაღების, ოპოზიციის წარმომადგენლების წინააღმდეგ სისხლის სამართლის საქმეების გახსნისა და პროტესტის ჩახშობის თაობაზე.

სენატის საგარეო ურთიერთობათა კომიტეტის თავმჯდომარის, რესპუბლიკელი ჯიმ რიშისა და ევროპის ქვეკომიტეტის უმცირესობის დემოკრატი ლიდერის, ჯინ შაჰინის წერილი საქართველოს მთავრობისადმი დღეს, 30 იანვარს გამოქვეყნდა. ეს სენატის საგარეო კომიტეტის მიერ საქართველოს მთავრობისთვის გაგზავნილი პირველი წერილია. აქამდე კრიტიკულ წერილებს მთავრობა ძირითადად კონგრესიდან იღებდა.

კრიტიკის პასუხად ქართული ოცნების წევრები ხაზს უსვამდნენ იმ ფაქტს, რომ საქართველოს ორპარტიული მხარდაჭერა აქვს და პარტნიორობას არაფერი ემუქრება. გარდა ამისა, ისმოდა განცხადებები კონგრესმენების მიკერძებულობაზე და მათ ტონით დაუწუნეს. მმართველ გუნდში ამბობდნენ, რომ საგულისხმო მათთვის მხოლოდ სახელმწიფო დეპარტამენტის და საელჩოს ოფიციალური განცხადებებია.

გაიგეთ მეტი სენატორების წერილზე:

გაიგეთ მეტი კონგრესმენების წერილებზე: