სამართლიანმა არჩევნებმა 8 ოქტომბრის საპარლამენტო არჩევნებთან დაკავშირებით, ხმის დათვლის პროცესისა და არჩევნების შემდგომ პერიოდში დაფიქსირებულ დარღვევებზე საოლქო საარჩევნო კომისიებში 244 საჩივარი შეიტანა. ISFED-ის ცნობით, აქედან უმრავლესობა ეხებოდა საარჩევნო კომისიების წევრების მიერ მოვალეობის არაჯეროვნად შესრულებას.

ISFED-ის ინფორმაციით, წარდგენილი 244 საჩივრიდან 93 საჩივარი სრულად დაკმაყოფილდა, 40 - ნაწილობრივ, 90 არ დაკმაყოფილდა და 20 საჩივარი არ განიხილეს (1 საჩივარი ჯერ არ განხილულა).

სამართლიანი არჩევნების ცნობით, მათი საჩივრების საფუძველზე გაბათილდა:

  • ზუგდიდის #66 მაჟორიტარული ოლქის #79 და #38 უბნების შედეგები;
  • მარნეულის #35 მაჟორიტარული ოლქის #34 უბნის პროპორციული კენჭისყრის შედეგები;
  • გლდანის #21 მაჟორიტარული ოლქის #54 უბნის მაჟორიტარული კენჭისყრის შედეგები.

საჩივრები ეხებოდა:

  • 41 შემთხვევაში შემაჯამებელი ოქმების ბათილობას და კენჭისყრის შედეგების გადასინჯვას:

"აღნიშნული მოთხოვნები დაყენებულ იქნა ძირითადად ისეთ შემთხვევებში, რა დროსაც შემაჯამებელი ოქმში გვხვდება გადასწორებული მონაცემები არ დგება ბალანსი, კერძოდ, სუბიექტების მიერ მიღებული ხმებისა და ბათილი ბიულეტენების რაოდენობა აღმატება არჩევნებში მონაწილე ამომრჩეველთა რაოდენობას."

  • 91 შემთხვევაში შემაჯამებელი ოქმების არასათანადოდ შევსებას;

"როდესაც ოქმში არასწორადაა ან საერთოდ არაა მითითებული სათანადო რეკვიზიტი, მაგალითად, ოქმის შედგენის თარიღი და დრო, კომისიის ბეჭდის ნომერი და სხვა."

  • 24 საჩივარი ეხება იმ საარჩევნო უბნებს, სადაც შემაჯამებელ ოქმებში არ დგება ბალანსი;

"კერძოდ, სუბიექტების მიერ მიღებული ხმებისა და ბათილი ბიულეტენების რაოდენობა აღმატება არჩევნებში მონაწილე ამომრჩეველთა რაოდენობას."

  • 18 საჩივარი შემაჯამებელ ოქმებში მონაცემების გადაკეთებას/გადასწორებას.