იტალიაში, ქალაქ გორიციის სადეპორტაციო ცენტრში მომხდარი ინციდენტის შედეგად, საქართველოს მოქალაქე, 37 წლის ვახტანგ ენუქიძე დაიღუპა. როგორც იტალიური მედია იუწყება, იგი გორიციის საავადმყოფოში გარდაიცვალა. მიგრანტთა უფლებადამცველი აქტივისტები ამავე გამოცემასთან ჰყვებიან, რომ საქართველოს მოქალაქე, ოთხი დღის წინ პოლიციასთან დაპირისპირების შედეგად მიღებულ დაზიანებებს ემსხვერპლა.

ამ თემაზე დღეს, 20 იანვარს საქართველოს საგარეო საქმეთა მინისტრის მოადგილე, ხათუნა თოთლაძე იტალიის ელჩს, ენრიკო ვალვოს შეხვდა. უწყების გავრცელებულ განცხადებაში ვკითხულობთ, რომ მხარეებმა გამოთქვეს მზადყოფნა ითანამშრომლონ მომხდარის მიზეზების დადგენისას.

საგარეო საქმეთა სამინისტროს ცნობით, ქართულმა მხარემ იტალიის ელჩს მოსთხოვა ინციდენტის შესახებ დეტალური ინფორმაციის მოწოდება. ელჩის ინფორმაციით, მიმდინარეობს გამოძიება და იტალიური სამართალდამცავების მხრიდან ყველაფერი კეთდება მომხდარის ოპერატიული გამოძიების მიზნით.

განცხადების თანახმად, მომხდარის თაობაზე, ასევე, დაგეგმილია საქართველოს ელჩის შეხვედრა იტალიის საგარეო საქმეთა სამინისტროს საკონსულო დეპარტამენტის დირექტორთან, ხოლო საელჩოს კონსული ადგილზე ჩავა.