უკანასკნელ წლებში ამერიკელმა მსახიობმა, რიზ უიზერსპუნმა სატელევიზიო შოუებში ერთმანეთზე უფრო საინტერესო როლები შემოგვთავაზა: იქნება ეს Big Little Lies-ში განსახიერებული საშუალო კლასის ემოციური დიასახლისი, მედლინ მაკენზი თუ გასულ წელს გამოსულ გახმაურებულ სერიალ The Morning Show-ს შთამაგონებელი ჟურნალისტი, ბრედლი ჯეკსონი.

ისეთი გავლენიანი კომპანიების შემდეგ, როგორებიცაა HBO და Apple TV+, რიზ უიზერსპუნმა ამჯერად Hulu-სთან ითანამშრომლა ახალ სატელევიზიო შოუს შექმნაზე, რომლის პირველი ტრეილერიც ცოტა ხნის წინ გავრცელდა.

სერიალი 2017 წელს გამოქვეყნებული ცნობილი ბესტსელერის, Little Fires Everywhere-ის მიხედვით გადაიღეს, რომელიც ორი ქალის, ორი ოჯახისა და ორი სამყაროს საიდუმლოებებით სავსე საოცრად ემოციური ისტორიის შესახებ მოგვითხრობს.

რიზ უიზერსპუნს პარტნიორობას კიდევ ერთი მთავარი როლის შემსრულებელი, კერი ვაშინგტონი უწევს. აღსანიშნავია, რომ ისინი ამასთანავე არიან ამ ახალი სატელევიზიო შოუს პროდიუსერებიც. ამის შესახებ ინფორმაცია მსახიობებმა ჯერ კიდევ ორი წლის წინ გაავრცელეს.

სერიალის პრემიერა 18 მარტს შედგება.