პარლამენტში ქართული ოცნების ყოფილი დეპუტატი ზაქარია ქუცნაშვილი თიანეთის მერის, თამაზ მეჭიაურის შეურაცხმყოფელ განცხადებას დისკრიმინაციულად პასუხობს. გარდა ამისა, ის ამბობს 2020 წლის არჩევნებში კანდიდატურის დაყენების შემთხვევაში, ის გაიმარჯვებს.

"გიჟი თავისუფალია... ჯერ ადრეა მაგაზე საუბარი, მაგრამ თუ დავაპირებ, რომ გავიმარჯვებ, ნამდვილად ვიცი", — განაცხადა ყოფილმა დეპუტატმა ტელეკომპანია მთავართან სატელეფონო საუბრის დროს.

თიანეთის მერმა, თამაზ მეჭიაურმა ყოფილი დეპუტატი ზაქარია ქუცნაშვილი შეურაცხმყოფელად მოიხსენია. პირად ფეისბუქგვერდზე მან თავისი და ქუცნაშვილის ფოტო გამოაქვეყნა წარწერით:

"ბოლო-ბოლო, ან კანდიდატურა დააყენე, ან **აკი! მით უფრო, კვლავ შენი წელი დადგა", — წერს მეჭიაური.

გარდა ამისა, თიანეთის მერმა დაწერა, რომ თვითონ არჩევნებისთვის კანდიდატურას აყენებს.

პირველად მეჭიაურმა ქუცნაშვილს შეურაცხყოფა მაშინ მიაყენა, როცა ორივე მათგანი მოქმედი დეპუტატი იყო. მეჭიაური ამბობდა, რომ ქუცნაშვილი ქართულ ოცნებაში მისი რეკომენდაციით მიიღეს, თუმცა არ დაუფასა. ის ქუცნაშვილს "წარაკუასა" და "ცუილას" უწოდებდა.

2019 წელს ზაქარია ქუცნაშვილმა დეპუტატის მანდატი და ქართული ოცნებას მას შემდეგ დატოვა, რაც მისი ინიციატივით ჩატარებული მართლმადიდებლობის საპარლამენტთაშორისო ასამბლეის დროს რუსი დეპუტატი სერგეი გავრილოვი პარლამენტის სპიკერის სკამში ჩაჯდა, სპეცრაზმმა კი საპროტესტო აქცია დაშალა.