შს მინისტრ გიორგი მღებრიშვილის ინიციატივით, შინაგან საქმეთა სამინისტრომ ოჯახში ძალადობის წინააღმდეგ სოციალური კამპანია ძალა ნდობას დაიწყო.

"ოჯახში ძალადობის წინააღმდეგ ბრძოლა კვლავ რჩება შსს-ს ერთ-ერთ უმნიშვნელოვანეს პრიორიტეტად. თუმცა, აქვე უნდა გავითვალისწინოთ ის გარემოება, რომ ამ ძალზე მგრძნობიარე პრობლემის დასაძლევად, იმისთვის, რომ პოლიციელმა შეძლოს მასზე დაკისრებული უფლება-მოვალეობის შესრულება, აუცილებელია თავად ძალადობის მსხვერპლთა და მოწმეების თანადგომა, მხარდაჭერა და თანამშრომლობა. მივმართავ ყველა მსხვერპლს: არ გაუჩუმდეთ ოჯახში ძალადობას! ნუ შეშინდებით! მთელი ჩვენი უწყება, 40 000 ადამიანი, თქვენ გვერდით ვართ, იმისთვის, რომ დაგიცვათ! - განაცხადა გიორგი მღებრიშვილმა.

შსს-ს ინფორმაციით, ოჯახში ძალადობის ფაქტებზე დაწყებული გამოძიების მაჩვენებლები "უპრეცედენტოდ გაზრდილია".

უწყების ცნობით, ღონისძიებაზე ოჯახში ძალადობის მსხვერპლებმა დამსწრე საზოგადოებას საკუთარი, რეალური ისტორიები უამბეს და იმის შესახებ ისაუბრეს, თუ როგორ გაუმკლავდნენ მათ წინააღმდეგ მიმართულ ძალადობას შსს-ს თანამშრომლების დახმარებით.

კამპანია ევროკავშირის მიერ დაფინანსებული პროექტის საქართველოს შინაგან საქმეთა სამინისტროს ხელშეწყობა ოჯახში ძალადობის წინააღმდეგ ბრძოლაში ფარგლებში ხორციელდება და მისი მიზანია ოჯახში ძალადობის პრევენციის ხელშეწყობა და აღნიშნული დანაშაულის წინააღმდეგ ქვეყანაში მოქმედი სამართლებრივი მექანიზმების, სახელმწიფო თუ სხვა არსებული სერვისების შესახებ მოსახლეობის ცნობიერების ამაღლება.